(nltimes.nl) – Un muhe Mericano di 64 aña a fayece na Suisa dialuna den un “capsula di morto asisti” specialmente diseña pa yena cu gas di nitrogeno pa mata un individuo door di asfixia. Esaki ta e prome instancia conoci caminda a usa e metodo pa caba cu un bida. Un fotografo periodista di Volkskrant cu tabata presente na e momento ey a keda deteni pa polis na e sitio.

E capsula, conoci manera e Sarco Pod, a ser crea pa provee ​​un “morto lihe, pacifico y confiabel” segun su diseñadornan. Segun rapport e dama a fayece pa mas o menos 4:01 p.m. riba dialuna, cu Florian Willet, e director di defensa di fin di bida The Last Resort, presente manera testigo.

Debi na e falta di oxigeno, conoci tambe manera hypoxia, el a perde conocemento y a muri poco despues cu e mashin a start. Su morto a keda confirma pa Dr. Philip Nitschke, e creador di e aparato Sarco y un defensor di e derecho di muri.

A lanta e Sarco Pod den un area di mondi isola na Schaffhausen, cerca di e frontera di Alemania. E dama a biaha pa Suisa specificamente pa e procedura aki, den cual un individuo ta subi den e camber y ta cuminsa e proceso riba su mes door di simplemente primi un boton. Despues gas di nitrogeno ta yena e capsula, causando cu e nivel di oxigeno ta baha te na casi cero dentro di un minuut.

Nitschke a splica cu morto den e Sarco ta parce loke ta pasa ora presion di cabina baha den un avion, lagando e pasaheronan sin oxigeno. “For di esnan cu a sobrevivi e experiencia ey, nos sa cu e no ta sinti manera sofocamento,” el a bisa e Volkskrant.

“Hende ta sigui hala rosea normal. Despues di mey minuut, nan ta cuminsa sinti nan mes desorienta. Nan no ta completamente conciente di kico ta pasando cu nan. Algun ta experiencia euforia leve. Despues nan ta djis bay off.”

Te cu recientemente, e gobierno Suiso no a comenta riba e legalidad di e Sarco. Swissmedic, e autoridad regulatorio di e pais, a declara cu no ta considera e Sarco un aparato medico y pues no ta rekeri un permiso. Adicionalmente, nitrogeno, un gas naturalmente presente den aire, no ta clasifica manera un substancia controla.

Sinembargo, dialuna, minister di Interior Suiso Elisabeth Baume-Schneider a expresa su preocupacionnan, bisando cu den su bista, e Sarco no ta cumpli cu e rekisitonan di seguridad di producto. El a bisa tambe cu no ta usa e nitrogeno den cumplimento cu regulacionnan kimico, segun e corant Suiso NZZ.

Riba e mesun dia, polis na Schaffhausen a detene un fotografo periodista di Volkskrant cu tabata sigui e caso y cu a purba saca potret na e sitio. E corant a bisa cu nan a perde contacto cu nan fotografo pa varios ora prome cu polis a confirma cu nan ta detene. No a duna mas detaye.

Autoridadnan por a detene Florian Willet tambe, ken tabata presente na e suicidio asisti. Autoridadnan Suiso a nenga di duna mas comentario riba e situacion te cu diamars mainta.