Durante un conferencia di prensa ‘extraordinario’ cu Gobierno di Aruba a ofrece ayera, tambe tabata presente Sharline Koolman, hefe di departamento di malesa contagioso di Directie Volksgezondheid DVG y Edwin Kelly, director di Directie Luchtvaart.

Koolman a expresa cu e parti cu DVG ta encarga relaciona cu e dos caso confirma di coronavirus na Aruba ta e control di esunnan cu a haya contacto cu e personanan infecta. Di loke ta trata e Mericano, a afirma cu e tabatin dos dia na Aruba caba y tin cu bay pa e compania estatal na unda e tabata haci algun trabou pa laga cada hefe di departamento sa cu mester traha un lista pa DVG, pa haya e contactonan directo di e persona cu por tabatin contacto cu e pashent.

A base di esaki, Koolman a manifesta cu e personanan lo wordo manda cas pa isolacion y lo wordo evalua tur dia. Esaki no ta nifica cu nan tin sintoma, pero esey ta net locual kier evita. Esunnan cu no a haya contacto directo cu e persona lo por bay traha y DVG lo bay ta den e compania pa evalua e situacion.

El a bisa: “Trahadonan no mester bay den panico, si nan tabatin contacto cu e persona aki, nan tin cu tuma contacto cu e manager y atende cune.”

Koolman tambe a trece dilanti cu 90% di e casonan casi no tin sintoma; y e dos caso cu a haya positivo na Aruba ta cay den e categoria di edad cu no ta haya mucho sintoma – y nan no tabatin hopi sintoma tampoco.

Di mesun manera, el agrega cu tur departamento mester tin medida di higiena y laba man, pero no solamente esey, sino cu tambe desinfecta luganan. Por ehempel balie cu hende ta custumbra di bay, evita pone man na cara lo mas tanto posibel, limpia e man di porta y no duna man pa otro hende, pa motibo cu esey ta e manera di contagio mas facil.

E virus ta pasa door di gotanan di awa di nanishi of boca, no ta biba den aire. Pa hay’e mester ta den contacto cu e persona infecta.

Asina mes, Koolman a agrega cu tin virusnan cu por ta mas peligroso cu coronavirus, por ehempel hepatitis B of sarampi, cu tambe ta eyfo y hende tambe mester tin atencion pa nan.

Importante ta pa comunidad sa cu sintomanan di coronavirus ta tosamento, rosea cortico y keintura. Tocante un articulo cu a sali ribaa e website BusinessInsider, den cual a publica cu e virus lo por afecta e mesun persona dos biaha, Koolman a contesta cu aworaki cientificonan ta purba geneticamente pa saca mas informacion. Ta existi hende cu por mas cu ta haya vacuna, e curpa no ta reacciona riba dje. Den caso asina si por infecta dos biaha; pero e ta un caso den e miles cu a keda conoci.

Tambe Koolman a trece dilanti cu door cu ta un virus nobo, ta mustra cu muchanan no ta wordo afecta; pero cu el a menciona cu instancia encarga di Wit Gele Kruis tin planea di duna un presentacion pa bisa con por atende cu muchanan na scol desde crèche y kleuter bay ariba. Loke el a recomenda ta pa laba e man di muchanan constantemente.

Esun mas vulnerabel ta hende grandi. Nan ta haci un reunion cu tur manager di casnan di cuido y a pidi pa controla pa hende cu tin grip of ta malo, no bay haci bishita na un persona na un cas di cuido.

Edwin Kelly director di Directie Luchtvaart, tambe a trece dilanti cu e decision di restringi vuelonan for di Europa y no di Merca a wordo tuma door di Bureau Rampenbestrijding. Esaki evaluando tur posibilidad y e consecuencia di tuma decisionnan asina ta hopi grandi. Mester ta cauteloso pa motibo cu nan tambe mester wak e area di turismo. Tin un balansa cu ta keda fragil y tur dia nan ta reuni pa papia di esey y keda monitor e situacion, y asina tuma medidanan segun ta necesario.