Ayera durante prome rueda di prensa di gobierno pa 2018, minister Plenipotenciario Guillfred Besaril (MEP) a conta un poco di su biahe recien pa Roma hunto cu organisacion internacional COTAL America pa un encuentro special cu Papa Francisco. Algun bandera di Aruba a keda bendiciona pa prome biaha por medio di un Papa anto a laga atras tambe algun obheto di Aruba como memoria na Vaticano.

Manera conoci, recientemente minister Plenipotenciario tabata na madre patria Hulanda y den cuadro di un invitacion di COTAL America – un grupo strategico turistico – pa bay Roma y bishita Papa Francisco.

Den bista cu tur problemanan cu mester a atende, e prome minister di Aruba no por a compaña minister Besaril pa e encuentro special aki. “E bunita di e bishita aki tabata ta sigur pa conoce e Papa y mi a pidi e bendicion pa pueblo di Aruba cu na e momento ey tabata pasando den momentonan sumamente dificil cu e caso lamentabel di e dos angelitonan cu a fayece.” E minister plenipotenciario a hiba algun bandera di Aruba cu Papa Francisco a bendiciona; uno lo bay den Staten, otro lo bay pa Ministerraad anto e di tres bandera bendiciona lo bay pa e ministerio di minister Plenipotenciario.

E minister a haya oportunidad pa trece algun recuerdo pa Papa Francisco. Ayera mes sr. Besaril oficialmente a haci entrega di un di e banderanan bendiciona na Vice Presidente di Staten Alan Howell (POR) y tambe un otro na prome minister Evelyn Wever-Croes (MEP).


Pais Aruba finalmente a haya luga na COTAL
Despues di a ricibi e bendicion di e banderanan, na dado momento bo ta haya oportunidad pa laga recuerdo atras pa asina aki Papa Francisco por tin algo pa mustra di e bishita cu el a haya di tal mandatario di tal pais. Den e caso di sr. Besaril, el a haya e oportunidad di comparti cu Papa Francisco un set di pica di Papaya cual ta algo hopi tipico di Aruba. Ora cu Papa Francisco a tuma e regalo for di e minister anto el a scucha kico e ta, el a bira bisa su assistent pa e anochi ey mes e percura pa e pone banda di su cuminda pasobra e kier purb’e segun sr. Besaril a laga sa.

“Pa mi e momento ey realmente e tabata un interaccion cu su persona, y dado momento esaki ta duna bo un alegria pasobra e no ta djis yega bendiciona bandera y sigui cana bay.” Vicky Perez di Vocal Aruba/Miembro di directiva di COTAL America tabata un di esunnan cu a logra hiba Aruba na Vaticano.

“E tabata un logro cu nos ta trahando pa un aña caba. Esaki ta prome biaha den historia di Aruba cu nos ta bishita Vaticano y un Papa ta duna e bendicion na nos bandera. E tabata algo sumamente special ora cu minister Besaril a duna e cuadra di fotografo Ayrton Tromp y ora Papa mes a reacciona. E tabata un alegria inmenso pa nos,” sra. Perez ta expresa.

Pa prome biaha den historia di Aruba a wordo logra cu tin un luga den e hunta di directiva di COTAL (Confederacion de Operadores Turisticos de America Latina.) Na Latino America e organisacion aki tin un poder bastante grandi pa locual ta trata relacionnan tambe cu otro organisacionnan grandi di turismo. Aworaki Aruba como pais tin un bos y voto sumamente mas grandi den e confederacion aki. Esaki ta algo grandi pasobra Aruba tin dos aña caba trahando cu e organisacion aki. Aruba awor por no solamente haci turismo strategico, pero tambe por market y promociona mas nos isla den e paisnan di Latino America unda ainda nos no a wordo acerca segun sra. Perez a splica ayera.