Segun Prome Ministro el a mustra liderazgo den e problema cu ministro di turismo, den e sentido cu si no ta p’esey, Oduber lo a bay na januari caba! Ta bon cu e ta bisa nos awor, pasobra hopi di nos nunca a ripara algo di esey! Y nos no por controla nada, pasobra no a simplemente publica e famoso 9 puntonan di conflicto, y talbes tambe e otronan cu a bin acerca. Si e ta bisa cu e coleganan a haci un intento extra pa purba resolve e diferencianan, ta na cada un di nos pa kere, of no kere, segun e grado di credibilidad cu e tin cerca cada un di nos.
Nos tin e leve impresion cu e credibilidad ey a baha bastante y esey pasobra nos no ta mira ningun señal di un lider cu ta y a actua na un manera contundente den e asunto aki. E caso di nombramento di gobernador tambe tabata ehemplar den esaki: el a keda draai rond y a keda sin propone otro persona, pasobra el a kere cu na ultimo ora Hulanda lo bay na su amen, manera nan a haci algun biaha caba. Pero esey tabata pasobra nan tabatin mester di su trabao di lobby ainda pa convence varios pais chikito den region di Caribe pa vota pa Reino Hulandes den Conseho di Siguridad di Nacion Uni. Cu esey for di caminda, a cuminsa un era nobo.
Ademas, esun cu a biba na Aruba durante e ultimo dos añanan lo mester a ripara cu e no tabat’ey mes, te pa e haci un impacto como lider. Ban tuma e caso concreto cu Oduber ta menciona como e famoso gota di awa cu a haci e hemchi bay over: e decision pa otorga e tereno pa e 600 cambernan na Holiday Inn. Mirando e problematica general cu tabata al caso, lo no tabata normal cu el a bisa e otro coleganan pa nan para un rato y no actua prome cu tin un acuerdo entre nan tres? No ta netamente su tarea di Prome Ministro pa e tin un ‘helicopter view’ unda e ta vigila e procesonan grandi?
Nos no a mira nada di esey, al contrario, pa di tantisimo biaha e ta laga e ‘Kroonprins’ haci y deshaci. Anto den un asunto unda cu su rason Oduber tabata reclama cu e no por hiba un maneho drechi pa cu turismo, si su colega ta dicidi pa su mes, violando ley ademas, ta ken ta haya y ken no ta haya. Niun dia nos a tende mita palabra di nos Ministro Presidente den e asunto aki pa señala e problema serio cu tin den nos sistema di emision di tereno y di permiso di salubridad publico pa hotel, cu ta data di un tempo hopi leu den pasado y cu no ta sirbi mas pa maneha e situacion den turismo di awendia, di cual sector casi nos tur ta depende.
Si e kier a demonstra algo di vision – otro palabra grandi cu ta ked’e hopi grandi – anto e mester a ‘step up to the plate’, pone e ministronan na nan luga, tur tres, y obliga nan yega na acuerdo sensato bao di su supervision. Pero, esey lo mester a cuminsa cu reconoce cu Otmar Oduber tabatin un punto fuerte aki: con bo kier dirigi turismo en general si otro ministro ta dicidi ken ta haya tereno y un otro ta practicamente obliga di duna e permiso di hotel, sino den corte e compania ta gana toch. Nos no a mira nada.
Y pa kita tur duda encuanto nos critica, nos ta trata di semper husga asunto na manera obhetivo, no pa simpatia cu tal o cual mandatario. Asina nos a critica den pasado reciente nos ministro encarga cu Husticia pa su letargia den atende criminalidad na Aruba, tambe den area turistico. Pero di igual manera nos a critica e actuacion di ex ministro Oduber, cu ta mete den cartera di Husticia na momento cu e ta pone placa disponibel pa Husticia, anto e kier pa su colega bin duna cuenta cerca su persona kico e ta bay haci cu e placa.
Aki ta unda gobernacion en general na Aruba a cuminsa bay ‘off track’ y nos no a mira ningun Ministro Presidente coregi e cosnan aki. E problema cu e sistema cu Oduber tabata propaganda prome cu el a bira ministro pa independisa ATA y otro asunto di gobernacion mas, limitando e fondonan cu ta keda den e caha general, no a keda atendi. Awor cu scarsedad di placa a cuminsa dal nan tur, awor nan ta cuminsa realisa pakico e no ta asina bon idea pa crea e tipo di ‘reino apart’ aki den gobernacion. Y esey no ta un asunto di e gobierno particular aki, pero ta algo general.
Y asina nos ta yega na e punto clave unda e gobierno aki no ta para e proceso di garna gobernacion for di otro via e creacion di mas ‘isla’ riba nan mes den gobernacion. Esey ta pasobra asina a crea mas posibilidad pa duna puesto na amigo y famia. Ta zona conoci?
