ORANJESTAD – Recientemente e tres prome ministernan di Aruba, Corsou y Sint Maarten a firma e Convenio di Savaneta. Esaki a tuma luga despues di reunionnan intensivo entre e tres prome ministernan di Islanan di Reino, y di e manera aki e tres paisnan ta estrecha lasonan entre e paisnan pa mantene cooperacion. Pa concretisa y structura e cooperacion aki entre e paisnan.
Esaki tabata e tercer cumbre entre e prome mandatarionan di Aruba, Corsou y Sint Maarten, cu e meta pa delibera hunto riba e puntonan di interes mutuo.
E palabracion cu a wordo concretisa den e Convenio di Savaneta ta cu e tres prome ministernan di Aruba, Corsou y Sint Maarten lo bin hunto por lo menos un biaha cada 6 luna pa elabora riba temanan nobo cu por bini pero principalmente pa trata e palabracionnan cu ta haci den e encuentronan.
Prome minister Evelyn Wever-Croes a indica cu den pasado tabata tin cooperacion, pero e tabata a base boluntario. Desde principio, e tres prome ministernan actual ta traha hopi bon cu otro y e interes comun ta pa logra cu e cooperacion aki sigui den futuro tambe, y no depende solamente di e tres ministernan presidentenan actual.
“Na e momento aki, tin hopi bon cooperacion entre e prome minister di Corsou y e prome minister di Sint Maarten y mi persona. Mi ta spera cu den futuro tur e prome ministernan di e paisnan por mantene e cooperacion cu otro tambe. Y e acuerdo cu nos a firma, ta e base pa e lasonan entre e paisnan di Reino bira mas firme y nos por traha hunto na bienestar di e paisnan”, prome minister Evelyn Wever-Croes a expresa.
E Convenio di Savaneta a wordo firma pa e prome minister di Corsou, Eugene Rhuggenaath, prome minister di Sint Maarten, Leona Marlin y prome minister di Aruba, Evelyn Wever-Croes den un ambiente ameno y dilanti di presencia di minister di Financia di Aruba, Xiomara Ruiz-Maduro, minister di Financia di Corsou Kenneth Gijsbertha, y minister di Financia di Sint Maarten Perry F.M. Geerlings.
