Ayera den corte di Gemeenschappelijk Hof van Justitie corte a dicta sentencia na fabor di minister di Asuntonan General, Innovacion, Infrastructura, Organisacion Gubernamental y Desaroyo Teritorial, Evelyn Wever-Croes y Natura NV y a duna luz berde na Natura NV pa construi un playa dilanti nan hotel.
Den un decision di 16 di juni 2023 minister Wever-Croes, a otorga na Natura NV un permiso cu condicionnan pa eleva y/of nivela e fondo di lama, den awa di dominio situa na Palm Beach, pa realisa, mehoracion, construccion y/of reconstruccion di un playa.
Fundacion Aruba Birdlife Conservation (ABC) tabatin obhecion contra e sentencia aki y a apela e decision aki dia 18 di october 2023. Hues a scucha ambos parti y minister Wever-Croes a argumenta cu e apelacion di fundacion ABC no ta fundamenta. Dia 15 di november 2023, corte a declara e apelacion presenta pa e fundacion fundamenta, el a anula e decision di apelacion di 18 di october 2023, y a revoca e permiso di construccion y a rechasa e peticion di Natura NV.
Tanto Natura NV como minister Wever-Croes a apela na un instancia mas halto. E fundacion a presenta un splicacion por escrito y corte a trata e caso den un sesion dia 17 di april 2024. Natura NV tabata representa pa e abogado mr. G.F. Croes, minister di infrastructura tabata representa pa mr. Y.F.M. Kaarsbaan, Directie Wetgeving en Juridische Zaken y fundacion ABC a ser representa pa abogado mr. G.W. Rep.
Natura NV ta un desaroyador di propiedad. For di 2018, e ta desaroya un proyecto di hotel na J.E. Irausquin Boulevard na Oranjestad, na altura di Palm Beach. E hotel Embassy Suites ya ta operacional. Pasobra e hotel no ta directamente conecta na e playa, Natura NV a traha un tunnel cu ta duna acceso na e playa dilanti e hotel.
Den un carta di 19 di augustus 2022 y un carta di 4 di october 2022 Natura NV a haci peticion na minister Wever-Croes pa otorga un permiso pa amplia e playa. Riba 18 di januari 2023, Natura NV a entrega un formulario di aplicacion pa un permiso di construccion na DIP y a referi na e carta di 4 di october 2022.
Riba 16 di juni 2023, minister Wever-Croes a otorga e permiso di construccion cu condicionnan. E condicionnan ta inclui cu e colocacion di un ‘golfbreker’ (kibra ola) pa asina drecha e playa ta bou di inspeccion y aprobacion di DOW, cu e vegetacion existente di manglo y fofoti na e playa ta keda preserva y cu e yerba di lama (Yerba di Kanja), den caso cu ta necesario ta move temporalmente bou di inspeccion di DNM.
Fundacion ABC tin como meta principal pa para contra desaroyonan cu por a menasa y degrada of kita balor di e naturalesa den y rond di Aruba. E fundacion tin miedo cu e construccion di e playa lo afecta e balornan di naturalesa cu ta presente na e luga. Den e awa di dominio tin yerba di lama proteha cu ta nativo. Tambe e liña di lama ta limita directamente cu manglo.
Corte a determina cu e tereno cu e permiso di construccion ta referi na dje den e Plan di Desaroyo Espacial cu Condicionnan ( ROPV) ta destina como “Playa” y “Zonanan Maritimo” cu un indicacion di ‘tambe importancia turistico’. E construccion di e playa no ta compatibel cu e indicacion ultimo menciona. E construccion real di playa mas probabel lo perhudica e balornan cu mester ser proteha den e zonanan maritimo.
Corte a splica cu construccion di un playa no ta cay bou di ‘uso adicional cu un importancia turistico na e luga’. Esey no ta compatibel cu e sistematica di e ROPV y ademas, uso adicional ta implica cu e uso mester ta subordina na e funcion principal. E uso di e tereno destina como “Zonanan Maritimo”, manera un playa, no ta subordina na e funcion principal. Mas tanto, e tribunal a considera cu e construccion di un ‘golfbreker’ (kibra ola) den e destinacion “Zonanan Maritimo” tambe ta contra e ROPV. Den e destinacion aki no ta permiti pa construi structuranan.
Basa riba e documentonan di e dossier y loke a ser trata den e zitting, Hof a constata cu Natura NV no a haci ningun peticion pa realisa e ‘golfbrekers’ y cu e realisacion di esaki tampoco ta permiti den e permiso di construccion.
Tocante e pregunta si un ‘golfbreker’ ta un structura y considerando e condicion den e permiso di construccion cu e ‘golfbreker’ mester ta realisa bou di inspeccion y aprobacion di DOW, Hof ta di opinion cu un ‘golfbreker’ ta un structura. Segun e ROPV, un structura ta un obra di construccion cu no ta un edificio. Un obra di construccion ta tur loke ta di palo, piedra, metal of otro material, cu ta directa- of indirectamente conecta cu e suela, of cu ta directa- of indirectamente sosteni na of riba e suela.
Un ‘golfbreker’ ta cay bou di e descripcion aki. Esaki ta nifica cu pa e construccion di un ‘golfbreker’ no por otorga un permiso di construccion.
Natura NV ta argumenta cu corte por poco a dicidi cu e tereno unda e actividadnan di construccion ta tuma luga, ta destina como “Zonanan Maritimo”. Si nan tin e destinacion “Zonanan Maritimo”, esaki no ta importa pasobra e construccion di playa ta permiti den esaki.
E minister ta argumenta cu corte tabata kier nenga e peticion solamente pa motibo cu e permiso di construccion ta referi na e tereno cu e destinacion “Zonanan Maritimo”. E construccion di playa den e destinacion “Playa” ta permiti. E minister a indica ademas cu e limitenan di destinacion den e ROPV no ta coresponde cu e situacion actual como consecuencia di erosion.
Hof a determina cu e actividadnan cu Natura NV tin den mente pa e construccion di un playa pa medio di eleva y/of nivela e fondo di lama ta cay bou di e trabou- of actividadnan describi den articulo 5.1, bou di seccion A, di e ROPV.
Hof ta determina cu e tereno pa cual e permiso di construccion ta otorga ta parcialmente destina como “Playa” y parcialmente como “Zonanan Maritimo”. E tereno cu e destinacion “Zonanan Maritimo” tin un indicacion di ‘tambe importancia turistico’. E pregunta principal ta si e construccion di un playa na e tereno cu e destinacionnan “Playa” y “Zonanan Maritimo” ta compatibel cu e funcionnan di e destinacionnan aki.
Hof cu e Tribunal ta di opinion cu e construccion di un playa no ta compatibel cu e funcionnan describi den articulo 29.1 di e ROPV pa e destinacion “Zonanan Maritimo” y solamente pa esaki, e permiso di construccion pa extento cu e tereno cu e destinacion “Zonanan Maritimo” no por ser otorga.
Pa loke ta trata e destinacion “Playa”, e construccion di un playa ta compatibel cu e funcionnan nombra pa e destinacion “Playa”. E destinacion no ta forma un impedimento pa otorga un permiso pa e construccion di un playa. Mester evalua si tambe ta cumpli cu e di dos condicion den articulo 5.1, bou di seccion B, di e ROPV: no mester compromete e balornan presente na e localidad of cercania.
Segun e Hof, considerando e condicionnan imponi na e permiso di construccion, tin suficiente seguridad cu no ta compromete e balornan presente na e localidad. E permiso di construccion por ser otorga pa e construccion di un playa na e tereno destina como “Playa”. Pues e argumento di e minister ta exitoso
Hof a indica adicionalmente cu pa e realisacion di un playa na e tereno destina como “Playa”, apart di e permiso di construccion, tambe un dispensa di Naturalesa ta necesario.
E apelacion di e minister ta exitoso. Hof lo anula e decision cu e tribunal a tuma dia 15 di november 2023 na unda el a nenga e permiso di construccion di 16 di juni 2023 tocante e tereno cu e destinacion “Playa” y a rechasa e peticion di Natura NV tocante di e tereno cu e destinacion “Playa”.
E decision cu Hof a tuma den e caso aki no ta cambia nada di esaki. Natura NV mester pidi un permiso nobo pa e trabounan di construccion. Den e proceso di otorgacion di e permiso, e opinion di Hof den e caso aki mester ser teni den consideracion.
