Mediante un comunicado di prensa prome minister demisionario Evelyn Wever-Croes y minister di Husticia demisionario Rocco Tjon a desmenti acusacion di un medio di comunicacion local indicando cu nan tabatin un portofon di polis.
Segun e medio aki a reporta un miembro di prensa vincula na e partido politico durante un combersacion na un fiesta lo mester a bisa cu e medio a haci un acuerdo cu e partido. E medio a hasta señala cu tin miembronan di prensa cu ta “spookambtenaar’ ya cu nan ta traha den prensa pero ta riba payroll di gobierno.
E medio local ta sigui menciona cu e reportero en cuestion a sigui conta na e fiesta cu dos minister a haya radio di polis, pero no a specifica cual minister esakinan ta. E medio aki a menciona, sin ningun confirmacion, cu prome minister y minister di Husticia ta e ministernan cu sa tin radio di polis.
Di otro banda prome minister demisionario Evelyn Wever-Croes y minister di Husticia demisionario, Rocco Tjon, a reacciona mediante un comunicado di prensa den cual ambos ta desmenti e speculacionnan aki.
Prome minister a sigura cu su persona no tin radio di polis ni tampoco nunca tabatin radio di polis.
“Mientras cu Aruba henter ta den ambiente di paz y trankilidad preparando pa Pasco, cierto prensa comprometi pa daña ambiente cu nan engaño, den nan website ta remarca cu prome minister Evelyn Wever-Croes lo tin radio di polis. Ta di lamenta cu ni riba dianan di fiesta nan por stop di gaña!,” e comunicado a indica.
E mandatario, a refuta e noticia aki y ta cualifica esaki como “fake news”.
“Ami nunca a haya radio di polis. Mi ta kere cu Mike Eman a bay cune su cas na aña 2017 ora el a laga Bestuurskantoor full bashi! Por cierto ningun minister tin radio di polis. Esaki ta fake news UN BIAHA MAS di esnan cu si a wordo haya culpabel di metemento den asuntonan regarda cu portofon y cu no por respeta dianan importante di fiesta nos dilanti”, el a expresa.
Di su banda minister Rocco Tjon, mescos cu prome minister, a refuta e noticia aki y a sigura cu gobierno no tin portofon di polis. El a indica cu Comisario di Polis mes a confirma cu ningun minister tin radio di polis.
“Como Minister di Husticia y Asuntonan Social, responsabel pa Cuerpo Policial, mi por garantisa cu ningun Minister, NI AMI MES como Minister di Husticia tin un portofon! Ademas nunca mi tabatin un portofon, pasobra no tin necesidad pa cu esaki,” el a subraya.
El a splica cu el a tuma contacto cu Comisario di Polis Sr. Robert Candelaria y cu Candelaria a confirma na su persona cu ningun hende di gobierno tin un portofon. El a enfatisa cu Cuerpo Policial ta maneha tur cos cu tin di haber cu portofon y cu nan tin un registro tambe pa cu esaki.
E topico di uso di radio di polis y miembronan di prensa cu ta haya informacion y/of noticia di manera cu no ta respeta ley ta uno cu recientemente ta hopi den medio mirando e sentencia cu hues a dicta diaranson ultimo, dia 18 di december, den caso New York caminda cuater periodista local a ser declara culpabel di violacion di secresia oficial y soborno.
E sospechosonan di inicial R.P.L, B.L.R.K, N.E.A.G y N.M.Q.C.d.A. ta acusa di, for di periodo di prome di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.
Di e acusacionnan cu tabatin riba mesa, tres di e sospechosonan a ser declara culpabel di soborno, tur cuater sospechoso a ser declara liber di e acusacion di participacion den un organisacion criminal, tur cuater a ser declara culpabel pa violacion di secresia oficial di un agente policial.
Un di e puntonan cu defensa a presenta ta cu periodistanan tin libertad di recopila noticia, y cu esaki ta inclui e informacion cu e sospechosonan a haya pa medio di e portofon. Hues a splica den su sentencia cu e ta di acuerdo cu e argumento aki y a resalta cu e ta un derecho importante cu mester ser proteha y respeta.
Sin embargo, hues a subraya cu e no ta un derecho sin limite. El a splica cu ta ser limita pa derecho penal y pa normanan di cuido debido. Esaki ta significa cu periodistanan no mag di comete hechonan castigabel pa obtene informacion, y esaki ta precisamente loke a bay fout den e caso aki; e sospechosonan a comete hechonan castigabel pa haya acceso na e informacion confidencial.
