Prome Minister, Evelyn Wever-Croes y Minister di Husticia, Rocco Tjon y su delegacion na Hulanda a reuni cu Minister di ‘Rechtsbescherming’ (proteccion di derecho) di Hulanda, señor Franc Weerwind.
Prome Minister a expresa den un comunicado di prensa cu e reunion a bay den un bon atmosfera na unda cu a entrega y ricibi hopi informacion. Aruba y Hulanda tin un bon relacion di trabao, un relacion di hopi respet. Por nota e deseo di parti di Minister Weerwind pa yuda Aruba.
Den e reunion a trata topiconan di husticia en general y e sosten cu Aruba tin mester riba e tereno di seguridad. Door di e pandemia y e situacion financiero cu esaki a causa, husticia a sufri hopi y awo ta e momento cu Aruba mester recupera y fortifica e cadena di husticia. Esaki ta e meta di e mision di Minister Tjon na Hulanda.
“Mi ta contento cu mi por acompaña Minister Rocco Tjon den e reunion aki na unda cu a yega na bon palabracionnan y mi ta hopi satisfecho di mira e cooperacion cu tin y e deseo pa sigui traha hunto pa haci Aruba mas sigur”, Prome Minister a expresa.
