Ayera via un comunicado di prensa Prome Minister Evelyn Wever-Croes a duna di conoce e partnernan di Aruba a firma e Memorandum of Understanding (MOU) cu Citgo.

Esunnan cu a firma tabata e mandatario mes y Renny Arends na nomber di gerencia di Refineria di Aruba NV, cu oficialmente ta propietario di e tereno y di e refineria y demas facilidadnan. Anteriormente ya representantenan di Citgo a firma e documento na Houston, Merca. Cu esaki anto e MOU a keda formalisa.

Den rueda di prensa ayera mainta, na momento cu ainda no a firma e documento, Prome Ministro a duna un aclaracion riba e tema di e acuerdo cu Citgo cu lo permiti gobierno di Aruba haya disposicion di e facilidadnan di entre otro e refineria y terminal di crudo. E mandatario a splica un biaha mas loke den linea general el a duna di conoce prome cu fin di siman tambe. Esey ta cu a yega na un Memorandum of Understanding (MOU) cu Citgo, den cual Aruba ta haya e instalacionnan na su disposicion, pa por busca un partner cu por opera esaki. Segun Wever-Croes, na momento cu haya un partner adecua, ta bay handle e terminacion di e contract cu Citgo. Durante su intervencion ministro presidente mes ta bisa cu Citgo ta masha consciente di nan derechonan y no lo cede esakinan sin mas. Kico esaki den futuro lo por significa den e negociacion pa termina e convenio, e no a elabora ariba.

Tambe a bisa cu lo dura te october 2020 pa constata segun contract cu Citgo no a cumpli cu nan obligacion di rehabilita e refineria y cuminsa opera. Di otro banda, ta bisa cu Citgo a anuncia cu pa mas tempran cu nan lo por haci algo cu e facilidadnan na Aruba ta despues di 4 aña cu e transicion pa un gobierno nobo na Venezuela tuma luga. Esaki pa e cantidad di asunto cu nan mester atende na Venezuela mes prome. Segun Wever-Croes, pa e tempo ey Aruba lo mester por a haya un partner pa sigui desaroya algo riba e tereno. Na momento cu haya e partner ey, cu cual Aruba kier sigui, ta bay negocia e terminacion di e contract cu Citgo, manera bisa anteriormente caba.

Bancarota.
Tambe e mandatario a menciona e posibilidad di un eventual bancarota di Citgo Aruba Refining NV, cu por bira realidad a traves di un peticion pa bancarota di banda di un compania contratista na Aruba cu ta busca pago pa e debenan cu Citgo Aruba Refining tin cu nan. Di un banda un bancarota asina, segun e mandatario, lo por conveni Aruba pasobra lo no tin un otro partido den e convenio cu Aruba. Di otro banda esaki por percura pa e compania bay failliet y no ta paga e trahado ni otro acreedornan.

Di tur manera, e mandatario ta bay invita un delegacion di Citgo pa bin Aruba pa conhuntamente atende prensa y clarifica e puntonan cu na e momento aki ta parce di ta contradictorio. Tambe el a comenta cu Citgo no ta mustra un bon partner awor, pero cu si, laga nos supone cu bin un otro situacion na Venezuela y por confia atrobe den Pdvsa y Citgo den un situacion normalisa, anto riba su mes esey lo ta un bon alternativa pa Aruba. Pero warda riba e transicion gubernamental na Venezuela plus cuatro aña pa nan por bin haci algo, ta un periodo demasiado largo pa Aruba sinta warda riba, pues p’esey e iniciativa pa busca otro operador desde awor caba.