Dialuna atardi Prome Minister Evelyn Wever-Croes a reuni cu Premier Mark Rutte riba topiconan relevante pa Aruba. Un di e puntonan importante durante e reunion tabata e refinanciamento di e debe di Covid y e interes halto cu Hulanda a impone riba pais Aruba.
Durante su bishita na Hulanda, ya Prome Minister a reuni caba riba e topico aki cu Secretario di Estado Alexandra van Huffelen, y cu señor Marnix van Rij di Ministerio di Finanzas. Ambos, Prome Minister a remarca den un comunicado di prensa, di ta dispuesto pa yuda caminda cu por.
Prome Minister a informa Premier Rutte di tur e negociacionnan cu ta andando. Un reunion sumamente importante mirando cu ta Conseho di Minister di Reino mester aproba cualkier palabracion cu wordo haci. Durante e reunion tabatin hopi interes cerca tur esnan presenta pa scucha di Aruba y su progreso.
“E realidad ta cu Aruba ta bayendo bon, desempleo ta bahando, turismo ta bayendo bon y finanzas tambe ta na orden. Lo unico cu falta, ta purba na yega na un miho palabracion pa cu e interes halto cu Aruba a haya di Hulanda riba e debe di Covid. Pa cu esey, mi tin tur confiansa cu nos lo bay yega na un solucion cu ta na miho interes di pais Aruba”, Prome Minister a expresa.
