Ayera mainta un cargamento di aproximadamente 85 ton di frutanan, berduranan y otro productonan a yega na waf di Barcadera for di Venezuela den e barconan El Maracucho y La Gaviota na unda e capitannan y su tripulantenan ta bay bin Aruba un biaha pa siman, manera nan a informa.

E capitan di e barco El Maracucho, Giovanni Rangel, a conta redactor di Bon Dia Aruba cu nan a sali diadomingo ultimo for di Puerto di Guaranao, Estado Falcon y su barco a yega Aruba ayera 6or di mainta cu 35 ton di tomati, awacati, promenton, keshi blanco, maizena, chuculati, entre otro.

Igualmente a bira conoci cu nan ta esnan cu ta bende e productonan aki na e importador di Aruba y nan a palabra cu nan tin cu bin Aruba un biaha pa siman.

Rangel a solicita na Gobierno di Aruba pa den futuro considera e opcion cu nan mes lo por bende nan mesun productonan directamente na consumidor.

Prome minister Evelyn Wever-Croes den su conferencia di ayera a señala cu Aruba ta depende hopi di e comerciantenan. Nan a tuma e decision di importado cumpra e mercancia na e barconan pa motibo cu ta existi e rekisito di visa y pa personanan di e barconan aki bin y drenta na e waf di Playa nan tur mester di visa y esey na Venezuela no ta considera como algo factibel na e momentonan aki.

“Nos mester yega na un areglo cu nan no tin mester di visa y esaki ta e unico areglo: bo ta yega na waf, bo ta keda na e parti sigura di e waf y e agencia ta esun cu ta cumpr’e,” prome minister a sigura.

Un otro argumento cu a bin dilanti na januari di 2018 y na februari di 2019 tambe ora presidente di Venezuela Nicolas Maduro a dicidi di cera e frontera unilateralmente, agencianan di Aruba a bay busca rutanan alternativo y a logra. Aworaki Aruba no sa kico Gobierno di Venezuela ta bay haci, loke ta nifica cu ta miho pa agencianan aki no kibra nan ruta alternativo. “E intencion no ta cu e prijsnan ta bay bira mas halto. Mi a papia cu un doño di un fruteria y el a bisa mi cu e prijsnan ta baha considerabel. Mi ta sugeri pueblo di Aruba pa ta alerta pasobra na fin di dia comerciantenan mester coopera cu nos tambe,” el a sigura.

E capitan di e barco La Gaviota, Alexis Vargas, a menciona cu nan a trece aproximadamente 50 ton di banana, lamunchi, papaya, entre otro.