Prome minister tocante stop di recorte di salario pa empleadonan publico: “Tur esaki ta presupuesta y e gastonan personal, ainda cu esaki no ta bay surpasa e normanan financiero”

Den un conferencia di prensa di ayera mainta, Prome Minister Evelyn Wever-Croes hunto cu Minister di Finanzas y Cultura, Xiomara Maduro, a elabora riba e decision cu ayera conseho di minister di Reino a tuma pa acepta e proposicion di Aruba y stop e recorte di salario di empleadonan publico y semi-publico.

Prome Minister a splica cu esaki ta un peticion cu nan a haci durante comienso di aña pasa y sinembargo a tarda te awor pa haya e decision final.

Bayendo bek den tempo, ora pandemia di Covid-19 a yega y mercado financiero internacional a cuminsa cera porta pa Aruba, e unico alternativa tabata pa bay bati na porta di Hulanda y presta placa pa sigui mantene e pais y yuda esunnan cu lo a haya problema door di pandemia unda mester a cera frontera cu consecuencia cu entrada a baha na 244 miyon florin.

Mester a yuda esunnan mas vulnerabel den comunidad, mester a yuda sector priva pa companianan no kibra y mester a maneha e pandemia global aki, logrando surpasa e retonan di esaki.

Esey a pone cu mester a presta 916 miyon florin di Hulanda den total e cual a bin cu condicionnan unda un di nan tabata e recorte di salario di empleadonan publico y semi-publico cu 12,6 y recorte di 25% pa Ministernan y Parlamentarionan.

Esaki a cuminsa 1 di mei di aña 2020 unda e empleadonan aki a bin entregando nan salario, fin di juli 2022 nan a tuma e decision pa cuminsa di paga 5% bek di e 12.6% unda ainda a keda 7.6% pa lo cual Prome Minister a sigura cu nan a keda insisti y ayera mainta conseho di Minister di Reino a aproba cu e parti aki por wordo elimina, caminda e aña aki tur cos ta bay bek na normalidad.

Prome cu esaki, e cuadro legal a wordo traha caba manera el a comenta, e leynan ta prepara caba pa asina esaki por haya su forsa retroactivo te cu 1 di januari 2023. Tambe nan a percura pa e ora e placa ta den presupuesto pa paga tanto e vakantieuitkering di empleadonan publico y semi-publico como tambe e premie cu nan ta haya na november, cual tabata corta na 50% y lo haya bek 100%.

“Tur esaki ta presupuesta y e gastonan personal ainda cu esaki no ta bay surpasa e normanan financiero cu nos a palabra cu Hulanda, kiermen nos ta kedando den tur e palabracionnan cu a wordo haci a pesar cu nos ta bay paga e 7.6% bek e aña aki,” el a sigura.

Di su parti, Minister di Finansas y Cultura Xiomara Maduro a trece dilanti cu esaki tabata un periodo hopi turbulento pa Aruba riba e parti financiero unda pandemia a trece cune un buraco financiero grandi pa presupuesto di pais Aruba pero banda di dje, condicionnan cu no tabata facil pa por yega na un sosten di likides necesario y por continua cu e gobernacion di pais Aruba, si no e problemanan di e pais lo tabata hopi mas grandi, manera el a expresa.

“Nos ta contento cu nos tabata por a conta cu e yudansa aki cu a yega na ora y na e caminda e mester tabata ta, no mas cu e yudansa aki tabatin condicionnan cu no tabata facil y sigur e parti aki di recorte tabata un di e condicionnan cu tabata hopi dificil pa gobernacion,” Minister Maduro a enfatisa.

Igualmente, el a sigura cu nan a premira kico tabata na caminda unda den tur retonan financiero cu tabatin cuminsando aña 2022 a tuma di lo cual cu ta mita di recorte y awor nan ta bay over den presupuesto 2023 pa tin tambe e otro mita pa bay na e normalidad. Di esaki, el a resalta cu esey tambe ta bay bek na normalidad cu tur e reto na unda nan a mira e carta di sindicatonan di siman pasa na unda a trece un punto dilanti over di longbelasting.

Famia Real na Aruba dia 30 di januari

Otro siman ta bay ta uno historico pa Aruba mirando cu Rey Willem Alexander y Reina Maxima hunto cu Prinses Amalia ta bay bin Aruba dialuna 30 di januari y nan ta bay yega den oranan di mainta den cual tin un programa pa e dos dia cu nan ta bay ta di bishita.

Dialuna 30 nan lo yega na Aeropuerto Reina Beatrix y despues ta bay haci un acto protocolar na Wilhelmina Park cu varios actividad di scolnan invita y nan lo cana riba caminda pa yega na Cas di Gobernador, siguientemente nan ta bay tin un encuentro cu Parlamento di Aruba y despues nan ta bay Bestuurskantoor unda ta bay tuma luga un Conseho di Ministernan di Aruba.

Riba caminda ta bay tin arte, baile y presentacion pa nan unda pueblo di Aruba ta invita pa acerca y asina por mira y saluda e Reynan y e Prinses.

E mesun dia ey den oranan di atardi entre 3or y 4or ta bay tin un actividad na San Nicolas caminda nan ta bay bishita Filomena College, unda tin e exposicion di Boy Ecury. Despues di esey nan ta bay cana den e cayanan di San Nicolas pa por aprecia e muralnan y na Nicolaas Store ta bay tin algun actividad unda tambe pueblo ta bonbini pa esaki.

Diamars 31 nan ta bay tin algun actividad unda den oranan di mainta Prinses Amalia ta bay bishita Aruba Aloe Balm despues e ta bay bishita Universidad di Aruba unda ta bay tuma luga un debate cu hobennan y despues atardi nan ta bay na stadion Frans Figaroa pa mira algun presentacion, siguientemente a wordo organisa un Bon bini Festival na Plasa Padu cu bailenan y cantonan dedica na e bishita Real aki cu ta bay termina na Fort Zoutman cu e Bon bini Festival.

Diaranson no lo tin actividad pa motibo cu nan ta bay sigui nan biahe pa Corsou.