Ayera mainta prome minister Evelyn Wever-Croes a tene un conferencia di prensa durante cual el elabora tocante varios topico. Un di e topiconan cu el a trece dilanti ta e situacion cu a tuma luga diabierna siman pasa na Aeropuerto Internacional Reina Beatrix, situacion cu e mandatario a remarca tabata inaceptabel.

Siman pasa tabata un siman pisa pa turismo na Aruba. Na comienso di siman taxistanan a tene dos dia di protesta, cual a afecta e servicio di taxi pa turistanan. Diamars e taxistanan a blokia, entre otro, entrada pa aeropuerto, cual tabata un situacion serio. Diabierna aeropuerto a confronta otro problema serio cu a conduci na e ciere completo di aeropuerto.

E situacion di ciere di aeropuerto, prome minister a resalta, tabata uno mas serio ainda y a rekeri esfuerso di varios stakeholder. El a splica cu na momento cu e situacion a presenta, tanto minister di Turismo Dangui Oduber y su persona “a cuminsa move shelo y tera pa mira kico ta pasando y kico ta locual cu por pasa.”

El a indica cu di su parti a Crisis Management Office pa atende cu e problema y di parti di minister Oduber e mes tabata esun encarga cu e situacion.

E mandatario a sigui splica cu despues di e sucedido minister Oduber a cuminsa haya reporte di kico por a bay fout y con por coregi esaki. Nan a haci palabracion cu ta warda riba e investigacion pa haya sa kico exactamente a bay robes, y no solamente e splicacion cu un tubo a kibra, pero si no kico exactamente a conduci na esey y principalmente pa traha un plan pa algo asina, cu ta conduci na ceramento di e aeropuerto, no sucede mas.

El a enfatisa cu e no por comprende con Aruba Airport Authority (AAA) no tin un plan B pa algo simpel manera un tuberia di awa cu ta kibra no tin un plan B. “Esaki ta algo inaceptabel pa gobierno, esaki ta algo cu minister Dangui Oduber a bisa tambe tanto na su hunta y directiva di AAA y esey ta algo cu na minister raad nos tur ta reitera,” el a subraya.

Prome minister a resalta cu en berdad Aruba ta den recuperacion, pero cu tipo di problemanan manera loke a sucede na aeropuerto diabierna ultimo, Aruba no ta bay recupera. Pa motibo ey e investigacion cu mester realisa pa haya sa kico a pasa, pero principalmente kico ta bay pasa awo pa evita algo asina ta bolbe pasa, ta hopi importante.

E mandatario a indica cu a base di analisis di riesgo hopi compania ta na altura di kico ta e riesgonan y a base di esaki nan ta traha un plan di contingencia riba cada riesgo. Un compania ta zorg cu e por garantisa cu su operacion por continua, aunke algun di e riesgonan aki manifesta nan mes.

El a señala cu AAA tambe tin esaki, y hasta pa cosnan hopi mas grandi nan tin plan B y hasta plan C. El a reitera cu tabata inaceptabel cu nan a cera aeropuerto casi full un dia pa un tuberia di awa cu a kibra of pa motibo cu no tin airco.

El a indica cu aunke aeropuerto a habri back diasabra y ta operando normal back, nan n ta bay lubida ribe loke a sucede y ta pendiente pa reuni otro siman cu AAA pa asina haya mas informacion detaya riba kico a exactamente a conduci na e problema cu a hiba na un ciere y kico nan ta bay haci pa evita cu un situacion asina ta bolbe ripiti.

Contestando pregunta di miembro di prensa, prome minister a splica cu loke ta sigui aworaki ta cu otro siman nan lo reuni cu AAA ora cu e rapportnan un poco mas avansa pa nan tin un miho bista.

El a sigui splica cu e prome cos cu a sucede despues di e incidente ta cu AAA ta carga cu tur riesgo y gasto cu a resulta pa motibo di e ciere di aeropuerto. El a indica cu AAA tin un seguro pa algo asina y a haci palabracion cu e aerolineanan cu nan ta esun cu ta cubri e gasto di e biaheronan y e aerolinea na su turno ta regla e asunto cu seguro.

El a agrega cu e gastonan ta wordo cubri pa seguro y no ta algo cu AAA ta cubri for di su propio saco.

Pa loke ta e imagen mes di Aruba, e mandatario a enfatisa cu loke a pasa ta un berguensa, specialmente pasobra Aruba ta un pais lider y pionero den turismo. El a indica cu si tabata algo cu pasa cu tin di haber cu accion pa cual motibo mester a cera e aeropuerto, tal bes lo tabata mas comprendibel, en bes di e motibo cu un tuberia di awa of pasobra no tin airco a cera e aeropuerto.

El a sigui splica cu e daño ey di imagen tanto AAA como Aruba Tourism Authority (ATA) ta monitor pa nan traha nan plan di contingencia pa wak con nan ta bay controla e dañonan cu e imagen di Aruba.

Pa loke ta e parti pa evita con algo asina bolbe sucede, manera el a menciona caba, ainda nan ta pendiente pa tende for di AAA den e reunion di proximo siman kico otro tipo di riesgo tin, sobre todo teniendo na cuenta cu no ta prome biaha cu e tema di problema di airco ta bin dilanti. “Mi no ta compronde dicon despues di e prome biaha no a coregi e situacion,” el a enfatisa.