Diadomingo ultimo den oranan di anochi, minister presidente Evelyn Wever-Croes a duna di conoce e di nuebe caso di persona contagia di coronavirus (COVID-19) na Aruba.

Tocante esaki, el a informa comunidad cu ta trata di un persona local residente di e isla, cu ta den bon estado di salud.

“E nuebe pashent cu a wordo constata positivo ta den bon estado di salud, asina tambe e prome pashent cu ya caba ta na Merca bek na su hogar y otronan tambe ta den mesun condicion, mustrando sintomanan leve”, Wever-Croes a declara.

Di e pashent number nuebe, el a sigura cu ta trata di un caso di transmision local; no ta un caso importa cu e persona a bay exterior y bin bek cu e virus, e persona aki no a biaha den hopi tempo.

Te na e momentonan aki, Wever-Croes a laga sa cu di e nuebe caso positivo na Aruba, 2 ta turista y 5 ta persona local cu a biaha na New York y Miami y 2 cu a wordo contagia cu e virus localmente.

Wever-Croes a menciona cu ta importante pa para keto y ripara cu tur hende a cuminsa pega otro cu e virus na Aruba y esey ta algo cu mester vigila hopi di cerca. Pa e motibo aki tur loke ta wordo haci pa ‘distanciamento social’, pa hala leu for di otro, pa no aglomera, pa no ta hopi cerca di otro, ta birando mas urgente cada dia.

P’esey Wever-Croes a recorda cu ta keda e regla di no sali for di cas si no mester. Tocante persona cu ta bay beach y lama, el a bisa cu el wak algun potret di beachnan na Aruba cu hende a bay lama manera ta tempo di vakantie y esey no ta e caso. “Hende mester tuma e tempo aki na serio, si no e gara forsa riba nos y nos no por contene mas”, el a manifesta.

“Nos ta yegando den e situacion cu entre nos e virus a cuminsa plama”, el a comenta.

Asina mes, el a trece dilanti cu ta haci hopi sacrificio pa Aruba por keda protegi, pa e virus no plama di mas y a pidi ciudadanonan pa no laga e sacrificio aki ta den vano, door di actonan di iresponsabilidad.

Tocante e personanan cu a keda pega na exterior, el a bisa cu nan a tuma e decision di organisa e biahenan pa trece e hendenan bek na Aruba dentro di e siguiente dianan. E personanan mester wordo registra na ATA den e linea cu nan a publica, solamente esunnan cu ta registra ta esunnan cu lo ta bin bek.