E posibilidad di haya prestamo for di Hulanda cu cero interes pa pais Aruba por atende un situacion interno cu e crisis di Covid-19 a ocasiona, ainda ta den discusion debi na cierto exigencia di Hulanda pa medio di e supervision stricto di CAft.
Contestando pregunta di Bon Dia Aruba, Prome Minister, Evelyn Wever-Croes a bisa cu gobierno ta trahando riba e contestacion di e ultimo carta di CAFT. Igualmente el a priminti cu asina cu e contestacion ta cla, minister di Finansa y Economia, Xiomara Maduro lo bay mas den detaye riba kico tabata e peticion di CAFT y kico tur gobierno di Aruba ta bin haciendo.
Sinembargo e tin tur confiansa cu den e reunion di conseho di minister di Reino di awe, nan ta bay tene na cuenta e sacrificio cu pueblo di Aruba den su totalidad a haci. E ta haya specialmente esunnan di e sector publico, semi-publico y instancianan subsidia pa gobierno. Premier Wever-Croes tin tur confiansa cu e sacrificio aki ta un factor determinante y cu awe pais Aruba por haya e subsidio di e likides cu nos tin mester pa e siguiente 6 siman.
E prome mandatario a reitera cu loke gobierno a cuminsa haci pa corta su gastonan ta apenas e comienso. “E cortamento te aworaki nan ta e comienso pa nos por cuminsa enfrenta e crisis,” el a bisa.
Te ainda gobierno no sa cual lo bira e embergadura financiero total cu e crisis aki lo sigui ocasiona. Nan a purba tene cuenta cu embergadura pa full aña. Aworaki nan ta mirando, despues di e ultimo desaroyonan, cu nan por ahusta e calculacionnan inicial. “Pero realmente esaki ta un crisis sin procedencia, no espera y dificil pa calcula” el a bisa.
Durante trayectoria cu lo dura e crisis aki, gobierno ta evalua cada paso pa determina kico mas lo wordo haci pa atende cune.
Igualmente premier Wever-Croes a confirma cu na inicio di siman e tabatin un video conferencia cu su colega di Hulanda, Mark Rutte na sede di VNO. El a bisa cu e reunion tabata uno priva, unda nan a delibera riba diferente topico conhuntamente cu e prome mandatario di Corsou y St. Maaten.
Pero el a aclaria cu e reunion aki no tin nada di haci cu e reunion di conseho di minister di Reino cu ta tuma luga awe. Premier di Aruba a bisa cu e negociacion ta bayendo riba un bon caminda, unda nan tin un punto crucial den e reunion di awe. E punto aki tin di haci cu e sosten di likides cu pais Aruba tin mester pa por draai pa e siguiente 6 siman. E suma aki lo wordo destina pa paga salario, fondonan, etc… kiermen pa paga e gastonan cu gobierno tin.
