Te ainda gobierno di Aruba mes no sa kico realmente a motiva pa e gobierno di Venezuela a dicidi di cambia su posicion practicamente di un forma sorpresa. Vooral ora cu particularmente Aruba a cuminsa custumbra y adapta su mes na e situacion di e blokeo aereo y maritimo cu e gobierno di Venezolano a impone unilateralmente contra e islanan ABC.

Por cierto, te ainda gobierno di Aruba no a ricibi oficialmente e documento aki. No ta cla si esaki tin di haber cu e anuncio cu supuestamente Hulanda lo reconoce e credencial di e consul nobo di Venezuela na Aruba, Carlos Mata Figueroa.

Segun e mandatario e tema di Venezuela a bin prominentemente durante e reunion cu nan a sostene cu e minister di Relacion Exterior di Reino, Stef Blok na Corsou. E mandatario aki a gewoon bisa cu e lo purba di lanta e embargo cu presidente Nicolas Maduro a impone riba Aruba y tambe contra Corsou y Bonaire.

Nos mandatario a considera esaki como un esfuerso ultimo di e mandatario nobo Hulandes prome cu e ta baha den su funcion den un periodo cortico di tres siman. Te hasta el a puntr’e riba e nombramento di e consul nobo di Venezuela, y e contesta cu el a haya tabata cu e asunto aki ta bou tratamento ainda. Te ainda e credencial como diplomatico no a wordo otorga na e ex-militar aki acusa tambe pa Merca di ta parti miembro di e cartel de Los Soles mescos cu ex-militar Hugo ‘El Pollo’ Carvajal.

Pa kico awor si nan a haci’e?
Nan a haya un copia di e documento cu a cuminsa circula na Corsou di locual a keda concretisa diasabra ultimo, pa medio di e firma di e mandatario Hulandes y tambe pa vice-presidente di Venezuela, Tereck El Aissami. E prome mandatario di Aruba ta spera cu loke ta circula ta asina. E ta haya cu den un situacion asina, unda logicamente como mandatario e tin cu carga un responsabilidad, pero e caso aki di relacion exterior den Reino, e no tin e responsabilidad final pa carga. Esaki ta un posicion ambivalente pe.

El a laga sa cu basicamente loke a keda firma ta e mesun documento cu nan a yega di delibera tres luna pasa, ora cu e crisis diplomatico aki a inicia. Pero semper gobierno di Venezuela a abstene di firme. E pregunta cu ainda ta keda den laira ta: Pa kico awor si nan a haci’e? Un pregunta cu e mesun prome minister di Aruba no tin contesta pe. E ta haya cu e unico cos cu a cambia di e documento ta e fecha. Tambe otro tipo di palabracion cu ya tabata wordo ehecuta.

Compromiso
E documento aki for di su creacion ta crea un compromiso pa e paisnan envolvi por traha hunto pa combati ilegalidad y contrabanda. Aparentemente esaki ta den corto e compromiso cu a keda firma pa asina gobierno di Venezuela por a habri su frontera bek. Tur e negociacion aki a wordo realisa pa medio di e mision diplomatico di embahada di Hulanda na Caracas.

E mandatario a recorda e pregunta cu gobierno mes y prensa local a yega di formula: Kico tin aki tras? E mes no por compronde mucho kico tabatin tras di e medida di embargo aki, ya cu te hasta contrabanda no ta un cos cu tabata nobo. Pero e pregunta aki a keda den laira pasobra e mes no sa kico tin aki tras atrobe. “Echo ta cu e documento a wordo firma. Mas cu esey ami no tin tampoco”, e di.

A pesar di e situacion aki, e prome mandatario ta reconoce cu e ta un bon noticia, ya cu e acuerdo ta facilita pa nos hendenan por bay Venezuela ya sea pa motibo di salud of familiar. Ademas ta importante pa tene un bon relacion cu nos bisiñanan. Aunke nos a cuminsa custumbra caba na e blokeo aki, sin duda e tabatin su impacto pa nos pais y pa costo di bida. Pero el a aclaria cu e decision aki no kiermen cu ta ‘business as asual’, ya cu mirando e retonan cu Venezuela ta pasando aden, Aruba mester ta mas stricto den su posicion.

Maneho di admision y transporte
Aunke e frontera ta habri di banda di pais Aruba, tin cierto condicion pa e bishitantenan Venezolano pa nos isla. Tambe e transportacion specialmente maritimo di productonan fei Venezuela pa Aruba tin cierto exigencianan.

Minister Chris Romero (MEP), encarga cu transporte a indica cu e trafico aereo cu Venezuela a cuminsa normalisa; y e ta continua manera tabata semper. Mientras cu e parti maritimo ta conoce un cambio, ya cu e barconan of piñeronan cu ta trece carga mester ta registra na Venezuela pa trece carga na Aruba. Esaki a keda expresa den un carta oficial cu e mandatario a manda na nos autoridadnan maritimo. Tambe e importadonan di productonan di Venezuela tin cu mustra un certificacion di origen. Ainda no a keda determina entre e diferente autoridad, entre nan duana, e documento y rekisitonan cu nan ta acepta pa e productonan por drenta.

Tanto premier Wever-Croes como su colega di husticia Andin Bikker (POR), a enfatisa cu gobierno a implementa control mas stricto pa evita ilegalidad. E maneho di admision ta stricto, specialmente pa esunnan cu ta bini como turista y despues ta dicidi di keda na Aruba. E maneho aki no ta bay conoce cambia, a contrario, e ta bira mas stricto, segun minister Bikker. Tambe nan ta bay mira hopi di cerca e fenomeno di matrimonio ficticio.

Mientras cu e mandatario Wever-Croes a señala: “Ilegalidad nos lo bay combati cu hopi mas forsa, mirando e circunstancia cu nos pais ta pasando aden. Ya caba cu hopi inmigrantenan no tin status legal na Aruba.”

Prome mandatario a haci un apelacion na e comerciantenan cu ta distribui fruta y berdura di Venezuela. El a bisa cu e tendencia cu antes nan tabata yega na waf di Barcadera y bay cu e productonan, ta bay cambia. Tin leynan y reglanan aplicabel entre nan di un permiso pa drenta, pero tambe di pago di impuesto, etc..