Diaranson mainta, Prome Minister Evelyn Wever-Croes y Indra Zaandam di Tijdelijke Werkorganisatie Aruba, a reuni via Zoom cu Secretario di Estado Alexandra van Huffelen. Topico di e reunion tabata e reformanan y e landspakketnan.

Ya na 13 di November di aña 2020, a haci palabracionnan cu Hulanda y, manera ta conoci, Hulanda a bin cu condicionnan pa Aruba haya placa pa sobrevivi durante e pandemia.

Segun un comunicado di prensa, Gobierno di Aruba semper tabatin e determinacion pa saca Aruba for di e crisis di Covid pa asina nos tin un Aruba mas fuerte y resiliente y pa haci esaki, mester a bin cu reformanan y cambia e sistema di goberna y administra nos pais.

Den e kwartaal aki, e ekipo di profesional di Gobierno di Aruba ta trahando riba casi 100 accion paralelo. Pa e siguiente kwartaal ainda mester a traha e agenda cu cantidad di e tareanan cu lo bay tin. Esaki, Prome Minister a indica, ta e intensidad cu e reformanan/ landspakketnan ta trece. “Pero, Aruba ta haciendo hopi bon”, Prome Minister a enfatisa.

Cada kwartaal Gobierno ta publica un reportahe na unda ta indica e proceso di e accionnan, cua a bay bon y cua mester di mas atencion. Prome Minister a compara e reportahenan di Aruba, Corsou y Sint Maarten dunando di conoce cu Corsou y Sint Maarten tin hopi codigo cora, cu ta pega y no ta bayendo bon, mientras cu Aruba tin un codigo cora so. Esaki ta pega, e mandatario a duna di conoce, door di Ministerie van Defensie na Hulanda y tin di haci cu e tema di Arumil, segun Wever-Croes a indica den e comunicado.

“Na Aruba e ta bayendo bon, nos ta reformando y cambiando e procesonan den Goberno na un un forma fundamental pa haci nan mas transparente y eficiente pa yuda nos comunidad hopi mas”, Prome Minister a remarca.

Tambe a toca e tema, aunke no profundo den e reunion aki, di refinanciamento di e debe di Covid y e interes halto. Gobierno ta wardando pa Hulanda presenta e conseho di nan abogado. Aruba ya caba a presenta e conseho di un profesor riba tereno constitucional cu ta mustra, na opinion di Aruba, cu Aruba por bin na remarc’e pa un interes mas abou. Hulanda a bay pidi un segundo opinion riba esaki cu nan abogado y despues cu e resultado di esaki drenta, lo sigui na mesa riba e topico aki.

“E tabata un hopi bon reunion y naturalmente semper ta bon ora di haya elogio como pais con duro bo hendenan ta trahando y con positivo e resultadonan ta. Secretario Van Huffelen ta pensa di bishita Aruba durante e ultimo simannan di Maart proximo mientras mi tambe lo ta na Hulanda prome cu e bishita aki y lo sigui den deliberacionnan pa logra baha e interes di e debe”, Prome Minister Evelyn Wever-Croes a duna di conoce.