ORANJESTAD – Dialuna prome di april, e prome curso di ‘Signs of Safety’ a cuminsa. ‘Signs of Safety’ ta un curso innovativo cu a wordo desaroya den añanan 90 na Australia door di profesionalnan den e area social. E curso ta trata e tema di proteccion di mucha y con trahadonan social por yuda mayornan y yiunan cu a pasa door di sospecho di abuso infantil of abuso infantil comproba, como tambe di problemanan di maltrato.

‘Signs of Safety’ ta parti di e ehecucion di Plan di Crisis Social (SCP) den colaboracion cu CEDE Aruba y ta conta profesionalnan cu ta traha riba tereno socialm pero tambe den enseñansa, husticia y salubridad. ‘Signs of Safety’ ta wordo implementa na Merca, Canada, y Hulanda entre otro.

Segun un comunicado di gobierno, na e ocasion aki, Prome Minister Evelyn Wever-Croes a hiba palabra y a cuminsa pa menciona e morto horibel di e dos angelitom Richandroh y Eugene, algo cu pa semper lo keda recorda cu a sacudi comunidad. Wever-Croes a duna un relato di e bida cortico di e dos muchanan y e manera cruel cu nan bida a wordo ranca. Un situacion tristo, na unda te awe preguntanan ta surgi; Con esaki por a pasa? Pakico niun hende a bati alarma? Unda e mama tabata? Con ta posibel cu niun hende tabata sa cu e baby a desaparece?

E echo horibel aki a pone pueblo henter realisa cu e problemanan mas grandi di nos pais no ta e problema financiero, a pesar cu e debe nacional a wordo redobla den apenas 5 aña te cu casi 90% di e GDP. E aña ey, Aruba tabata tin un deficit presupuestario di mas de 300 miyon florin. Sinembargo, e gravedad di e situacion financiero no por wordo compara cu e gravedad di e problemanan social di nos pais, un explosion social.

Gabinete Wever-Croes di e momento ey cu mas forsa ainda a cuminsa traha pa pone e ser humano central y pa percura cu algo asina horendo nunca mas pasa na nos pais. Danki na e vision y determinacion di Minister Glenbert Croes, hunto cu e veld social, e Plan di Crisis Social a wordo estableci.

“Mi ta hopi y pa semper gradici cu boso a confia Minister Glenbert Croes y hunto cu e minister establece e plan aki. Cu esaki, conhuntamente e veld social a mustra na unda prioridad mester haya atencion’, Wever-Croes a expresa na tur esunnan cu ta traha den e area social presente na e curso.

Ministerio di Asuntonan social cu ayudo di departamentonan concerni, a bin cu un plan. Pero hopi a duda cu si tin placa of si lo pone placa disponibel pa realisa e plan aki, cual segun prome minister no ta straño, pa motibo cu ya na diferente ocasion den añanan anterior, nan a tende esey caba, cu no tin placa. Mucho biaha promesanan a wordo haci cu lo inverti mas den e veld social pero esaki nunca a pasa.

“E diferencia e biaha aki, ta cu awo nos tin un gobierno serio.” Conseho di Minister di biaha a aproba y sostene e propuesta di Glenbert Croes y buskeda di fondo pa esaki a cuminsa. Gobierno a introduci e crisisheffing y di eynan e Plan di Crisis Social a wordo financia. Un total di 34 miyon florin, for di 2017 te cu 2019. Gobierno ta consciente cu 34 miyon florin no ta suficiente pero ta un comienso pa duna atencion serio na e explosion social aki.

“Mi ta hopi contento cu e curso ‘Signs of Safety’ ta tumando luga aki na Aruba, cu sigur lo yuda, den un manera innovativo señala y interveni mas lihe casonan di abuso infantil. Cu un lenguahe uniforma, un forma uniforma, pero specialmente un determinacion urgente. Esaki lo ofrece un miho comunicacion y transferencia entre e organisacionnan na Aruba. Di e manera aki, muchanan ta wordo poni central, pa asina nan sinti e calor y amor di esunnan cu ta rond di nan”, Wever-Croes a expresa.

Prome Minister a cera su discurso cu un citacion profundo: “No tin gozo mas grandi, ni recompensa mas grandi cu haci un diferencia fundamental den bida di un otro persona”.

Den nomber di Gabinete Wever-Croes, a gradici tur esunnan cu dia aden dia afo, ta traha incansablemente riba e tereno aki y a ripiti cu nan por conta cu Gobierno di Aruba mientras nan ta haci e diferencia den bida di specialmente nos muchanan.