Prome Minister ta sigura cu entidad Hulandes lo no mishi cu autonomia; Aruba lo por bay di acuerdo cu condicionnan pa sosten Hulandes pa otro siman

Placa na Aruba ta caba memey di november, pero tur cos ta mustra cu Gobierno por firma cu Hulanda riba e dos rijkswetnan, cu ta esun riba Supervision Financiero y tambe riba e entidad di Reforma y Recuperacion, asina Evelyn Wever Croes a declara ayera.

Prome Minister di Aruba a bisa cu e negociacionnan cu Hulanda ta andando ainda, aunke e intensidad a bira menos cu na comienso. Pero esaki kisas pa motibo cu en principio a yega na final di e negociacionnan. “Tin tres cambio cu nos ta considera hopi substancial cu ta nifica cu nos por ta mas cerca pa acepta e pakete.”

Un di e cambionan ta cu ya no ta papia di e di tres of di cuater tranche. Pa evita discusionnan, Hulanda en principio a laga sa di lo yuda Aruba cu e sosten pa e fondonan te cu december, sin inclui e prestamonan cu Aruba mes a cera. Pues lo tin fondo te cu december y esey ta trece trankilidad, segun Wever Croes.

Autonomia garantisa

Locual tambe ta un cambio cu pa Gobierno ta importante ta e inciso nobo den e ley pa e entidad di Reforma y Recuperacion. “Aki ta para explicitamente cu e entidad no por haya autoridad di Parlamento y Gobierno. Pa nos e tabata hopi critico cu e entidad lo no por tuma cierto autoridad cu ta tareanan di Parlamento y Gobierno. Pues e tema di autonomia ta garantisa.” Segun Prome Minister, awor cu e tema di autonomia no ta den e discusion mas, esunnan cu tabatin reserva pa e acuerdo cu Hulanda no mester keda preocupa.

Tambe ta asina cu ta bay tin un evaluacion di e funcionamento di e entidad despues di tres aña pa un comision. Gobierno di Aruba tin participacion den nombracion di personanan cu ta forma parti di e comision aki. E evaluacion aki, despues di tres aña, ta importante pa motibo cu prome, e entidad tabatin pa un periodo di seis aña cu e posibilidad di extension. Awor, por evalua su funcionamento y tambe su efectividad despues di tres aña pa asina por determina su continuacion.

Kier mira texto di ley

“Tin mas ‘hoor en wederhoor.’ E tres cambionan aki ta esunnan mas substancial. Nos ta den espera di e textonan final pa mira si nan ta inclui den e leynan.” Mester ta cauteloso, Prome Minister a enfatisa. E kier wak con e palabracionnan aki ta hinca den e texto final. Y consecuentemente e no por a duna luz berde ainda, aunke cu e ta contento cu Hulanda a tene consideracion cu e preocupacionnan di Aruba. Unabes cu nan ta den e textonan di e ley, “mi no tin mas motibo pa obhecion. Mi mester consulta cu Parlamento si. Mi no por firma y despues haya un mocion di desconfianza contra mi.”

Prome Minister a comenta cu berdad locual ta discutiendo riba dje ta similar cu locual Corsou a bay de acuerdo cune. E mes no sa si Corsou a ricibi e textonan di e ley, pero pa loke ta Aruba, ta spera di tin nan den man otro siman. Bon Dia Aruba a compronde cu e necesidad financiero di Aruba te cu december ta alrededor di 550 miyon florin, cu mester bin di Hulanda.