Minister di Infrastructura alabes Minister Presidente Evelyn Wever Croes no tin ningun reaccion riba e declaracion di Kanaan Baroud di AUSOMA International Education Center riba e proyecto di Juliana y Beatrix School.

Manera ta conoci, AUSOMA a haya un opcion pa desaroya un centro educativo, pero e opcion a vence dia 7 di Januari. A pesar di a pidi extension pa motibo cu no a ricibi tur informacion necesario di DIP, AUSOMA a inverti den plan pa dos edificionan.

E reaccion di Prome Minister Evelyn Wever Croes tabata cortico, esta cu ya Director di DIP, dr. Haime Croes a contesta Bon Dia Aruba caba cu no tin opcion y cu a informa Sr. Baroud cu no tin mas opcion. “Gobierno no a tuma un otro decision pa cu e edificionan,” Prome Minister Evelyn Wever Croes a informa Bon Dia Aruba.

Bon Dia Aruba a tuma contacto cu ex Minister di Enseñansa dr. Rudy Lampe, kende tabata kere den e proyecto y hasta a haya sosten den Parlamento. “Loke ami a haya ta un situacion cu Bureau Monumento a bisa cu e lo sali hopi caro pa Gobierno renoba Beatrixschool. E tempo ey a bisa cu e restauracion lo costa 5 miyon y Gobierno no tin e posibilidad financiero pa paga e suma ey.” Riba dje, e ex Minister a bisa cu cifranan di Direccion di Enseñansa mes ta mustra cu e dos edificionan mes no ta necesario pa e cantidad di alumnonan na Aruba cu ta baha continuamente. “E cantidad di alumno na Aruba a baha drasticamente. Riba dje, tin e problema di e trafico ora cu e scolnan tabata habri.”

E ex Minister a enfatisa cu e desaroyador Sr. de Veer cu a traha dos edificio di condominio ademas di a inverti den e parke Juliana, no tabata interesa den e dos scolnan, pero si lo tabata kier a mira cu e edificionan lo a haya un destino. “Nan a inverti hopi den e plasa y e mal aspecto di e dos scolnan cu ta birando un chollerhouse no ta algo cu nan kier. Nan lo tabata contento cu un desaroyo.”

Pues, basa riba analisis a dicidi cu Gobierno no por ni mester hinca miyones den e dos scolnan, ya cu tin opcion pa alumnonan. “E intencion tabata pa un scol secundario di Canada habri su porta na e centro educativo internacional pa brinda mas oportunidad pa alumnonan di Aruba pa caba nan educacion y sigui studia na Canada. AUSOMA tabatin contacto cu inversionistanan di Canada y asina a bin e plan, cu ademas lo a duna un empuhe na Caya Grandi ya cu studiantenan di afo lo mester luga pa nan por biba.”

Pues, pa Rudy Lampe e ta incomprendibel con Gobierno no ta para pa un bon proyecto asina. Su conclusion ta cu simplemente MEP kier kibra tur proyecto di RED. “Nos a firma un acuerdo di Gobernacion unda lo traha riba economia di conocemento. Nan no a cumpli cu ningun di nos puntonan. Ni cu Cannabis, ni cu economia di conocemento. Tampoco cu locual RED a trece den Gobernacion di Evelyn Wever Croes I, cu ta Integridad. No tin un camber di integridad, ni un bureau integridad. “.MEP no ta di confia. Nan a hasta actua contra ley pa kibra partner di coalicion (red. aki Lampe ta referi na e asunto di werksters di SKOA).” Pero e palabranan di Rudy Lampe a bira mas skerpi ainda, agregando cu “Evelyn Wever Croes no ta interesa den integridad, sino unicamente poder. E kier kibra otro, pa keda na poder. Y awor cu nos ta afo, mi ta wak cu nan kier kibra tur idea di RED. “

AUSOMA a mustra di lo bringa e caso den Corte, sea pa haya extension di e opcion of pa haya daño di perhuicio. “Pero si nan mester haya daño di perhuicio, ta Aruba ta bolbe perde. Ta Aruba lo mester paga, manera tabata e caso cu racetrack,” Rudy Lampe a expresa.