SPAÑA – Pedro Sanchez a tuma su decision despues cu su plan pa presupuesto di su partido socialista a wordo derota siman pasa den congreso.
E hendenan di Spaña lo acudi na e luga di votacion pa di tres biaha den 4 aña. E prome minister, Sanchez a anuncia un eleccion pa dia 28 di april proximo. Nan no tabata spera di bolbe vota te cu 2020.
Sanchez a logra den su gobierno creacion di trabou, y iniciativanan ambiental cu social. Tambe el a adverti pa tuma decision cu por hiba na un mayor confrontacion di un pais polarisa. “Spaña no merece pa keda pega debi na interes di partido. E pais ta pertenece na su ciudadanonan, nan ta dicidi. Nos ta defende un pais cu tin espacio pa tur hende”, Sanchez a bisa.
E decision pa eleccion nacional a bay lihe, pa motibo cu diputadonan di congreso a rechasa diaranson e plan pa gasto di gobierno pa 2019. “E presupuesto aki ta bon pa nos hende di henter teritorio di nos pais”, Sanchez a bisa. Un velada di referencia pa e aumento di e fondonan cu ta destina pa Cataluña.
Un di e promesa cu Sanchez a bisa ora el a asumi e cargo di prome minister ta pa drecha e relacion cu Cataluña, cu tabata mustra grave pa motibo di e decision cu Madrid a scoge, pa suspende e autonomia regional durante 7 luna a rais di un declaracion di independencia unilateral.
“E debate awo ta su nos kier un Spaña cu ta biba sin nostalgia pa un pasado cu nunca lo yega, y cu necesariamente tabata miho. E debate ta, ki tipo di pais nos ta defende? Ta evidente cu e derecha, cu su tres partido, ta defende un Spaña cu no tin luga pa tur”, Sanchez a bisa.
