E siman aki Prome Minister sra. Evelyn Wever – Croes hunto cu Minister di Turismo, sr. Dangui Oduber a bishita Hyatt Hotel y a tuma e oportunidad pa gradici gerencia y trahadonan di e hotel pa nan esfuersonan haci durante di e pandemia pa mantene turistanan contento y trahadonan na trabao.
‘Mas y mas ta mira cu ta recuperando di e parti mas pio di e Pandemia, den e cuadro aki mi kier a gradici gerencia y empleadonan pa tur e sacrificionan y trabao duro cu nan a haci. Pa a confia den Gobierno den bon tempo y menos bon tempo y cu awe por mira cu e hotel tin un grado di ocupacion di 90%, cual ta algo cu ta bisa hopi.’
Prome Minister Wever – Croes a sigui bisa cu tur esaki no por tabata posibel sin esfuerso di cada un trahado di e hotel, nan forma di traha, empeño y cariño cu ta pone cu turista ta bin bek cu hopi smaak.
Na e ocasion Prome Minister a combersa cu algun turista cu tabata hopi contento y satisfecho.
“Den nomber di Gobierno di Aruba ta gradici Hyatt pa tur locual cu nan a haci durante e Pandemia pa mantene e hotel, pa mantene trahadonan na trabao y paga nan mas cu 60%. Pero tambe specialmente pa yuda Aruba den recuperacion di turismo, Premier Wever – Croes a termina bisando.
