Prome minister Hulandes, Mark Rutte a extende e lockdown pisa di su pais cu tres siman mas ayera, memey di preocupacion cu tasa di infeccion no ta bahando suficientemente rapido y miedo tocante e variante nobo, mas transmisibel, cu a detecta pa prome biaha na Reino Uni.
“Casi tur hende por compronde cu no tabatin otro opcion pasobra e cifranan no ta bahando suficientemente lihe, y awo tambe nos tin cu enfrenta e menasa di e variante Britanico di e virus,” Rutte a bisa, anunciando cu e lockdown lo dura te dia 9 di februari.
Bao di e lockdown, tur scol y tienda no esencial ta cera, hunto cu sitionan publico manera cinema, museo y biblioteca. Tambe tin limite mas estricto riba e tamaño di reunionnan, tanto paden como pafo.
Rutte a bisa cu pa e studiantenan cu ainda ta permiti pa asisti na scol – muchanan preparando pa nan eindexamen y muchanan vulnerabel – distancia social di 1.5m ta aplica na scol awo, unda ta posibel.
El a agrega cu gobierno a pidi autoridadnan di salud pa conseho si un toque de queda lo yuda reduci tasa di infeccion, aumentando e posibilidad di toque de queda – algo cu gobierno te awo a evita durante e pandemia – den futuro.
“Nos ta den un situacion nobo serio”, Rutte a bisa, referiendo na aumentonan enorme den infeccion na Reino Uni. Minister di Salud, Hugo de Jonge a bisa cu e variante awo ta conta pa entre 2% y 5% di tur infeccion na Hulanda, pero ‘e expectativa ta cu, manera na Inglatera, e lo bira mas.”
Anuncio di Rutte a yega algun ora despues cu instituto di salubridad publico Hulandes, RIVM a anuncia cu e cantidad di infeccion nobo di coronavirus na e pais a reduci pa segundo siman consecutivo, referiendo na e reduccion como ‘e prome efeto’ di e lockdown nacional cu a cuminsa mita di december.
Infeccionnan nobo confirma durante ultimo siman a reduci 12% na 49,398, segun RIVM a bisa, mientras admision den hospital pa hende cu coronavirus a reduci 18%, y e pashentnan di Covid-19 nobo den Unidad di Cuido Intensivo a reduci 12%.
E cantidad total di fayecido pa Covid-19 na Hulanda awo ta mas cu 12,500.
Diaranson, un programa di test masivo ta cuminsando den un municipalidad net pafo di Rotterdam, e segundo ciudad mas pobla di e pais, despues cu un cluster di infeccion Covid-19 vincula na un scol primario a inclui al menos 30 caso di e variante nobo.
Siman pasa, Hulanda a bira e ultimo pais di Union Europeo pa cuminsa vacunacion contra Covid-19, cu personal di prome linea di hospital, y esnan cu ta cuida miembronan vulnerabel di sociedad siendo e promenan pa ricibi e vacuna.
