Dialuna atardi, oponentenan politico di Partido AVP, den nomber di un fundacion, a bay entrega keho na Ministerio Publico contra Prome Minister Evelyn Wever-Croes pa varios cargo. Prome Minister mesora a drenta den contacto cu su abogadonan pa entrega keho contra Melvin Tromp, pa motibo cu esaki a entrega un denuncia falso contra Wever-Croes na Ministerio Publico.
Den nos leynan penal ta stipula cu si un persona entrega un keho cu no ta funda y corecto contra un otro persona, e persona aki ta comete un delito. Melvin Tromp y su fundacion cu e aangifte falso cu nan a entrega, ta purba atacha integridad di Wever-Croes, segun un comunicado di gobierno.
Den un cantidad di documento cu Tromp a bisa cu el a entrega na Ministerio Publico, e ta basa su mes basicamente riba dos punto, cual, Wever-Croes ta enfatisa no ta berdad.
Prome punto: Cu Wever-Croes ta doño den Bufete di abogado di Hendrik Croes, kende ta tata di Wever-Croes. Esaki Wever-Croes a enfatisa cu no ta berdad y oponentenan politico no por prueba esey tampoco. Tambe Tromp ta bisa cu siendo doño di e bufete, Wever-Croes no solamente ta privilegia su tata, pero su mes tambe, loke Wever-Croes ta enfatisa cu sigur no ta berdad pasobra e no ta doño, ni tin parti den e compania di su tata.
Di dos punto: Wever-Croes ta esun cu ta duna instruccion na companianan estatal pa haci uzo di servicio di oficina di abogado di Hendrik Croes y asina privilegia su tata cu contract lucrativo. Esaki tambe Wever-Croes ta bisa cu no ta berdad.
Wever-Croes a expresa cu mientras Tromp no tin niun prueba di e acusacionnan contra su persona, e si tin prueba cu loke Tromp ta bisa ta falso. Wever-Croes no ta doño di Bufete di Abogado Croes-Wever-Ruiz, por lo tanto, ningun caminda lo haya su nomber poni como doño. Tampoco Prome Minister tin parti den e bufute, loke ta haci cu e ponencia di Tromp ta falso.
Riba e di dos punto di Tromp, cu ta bisa cu Wever-Croes ta duna compania estatal instruccion pa haci uzo di Bufete di Abogado di su tata, tambe ta falso. Wever-Croes a remarca cu casualmente, un poco simannan atras, el a pidi e companianan estatal cu ta resorta bou di su persona, pa entrega un declaracion por escrito con nan maneho ta pa e uzo di oficinanan di abogado.
Cada compania estatal a entrega por escrito cua ta e oficinanan di abogado cu nan ta uza y tambe nan a duna un splicacion cua ta e motibo cu nan ta scoge e oficinanan di abogado, dependiendo e experticio di e oficina di abogado y e problemanan legal cu tin. Tambe nan a indica cu nan no ta paga niun oficina sumanan exorbitante.
Y den e declaracion di e companianan estatal, tur a declara cu nan no a haya niun peticion, niun sugerencia y niun presion di parti di Wever-Croes pa scoge cua oficina di abogado nan por uza. Den e procedura ey, Wever-Croes ta bisa cu e no tin arte ni parti. Tur oficina di abogado cu ta wordo uza ta a base di e experiencia cu e oficina tin riba cierto tereno y na prijs rasonabel.
“Tur esaki, mi tin como prueba pa mustra cu locual cu Tromp ta papia y haci ta falso y mi lo bay entrega keho contra dje pa entrega di aangifte falso contra mi persona, Wever-Croes a duna di conoce.
Segun Wever-Croes, cu contrario na e gobernacion anterior, e no ta mete den decisionnan companianan estatal den entre otro cua accounting nan ta uza, cua seguro, unda nan ta lease auto, cu banco y tampoco cua oficina di abogado nan mester uza.
“Gabinete Wever-Croes ta mantene su mes na reglanan di Corporate Governance y como Minister encarga, mi no ta mete den e maneho di e companianan estatal. Mi tin integridad hopi na serio y ta parti esencial den mi bida. Por lo tanto, mi no lo permiti Melvin Tromp ni niun hende atacha mi integridad cu insinuacionnan falso contra mi persona”, Wever-Croes a finalisa bisando.
