Mirando cu leakmento di informacion medico ta algo hopi delicado y contra ley, ayera a bira conoci e ‘supuesto’ conclusion preliminar di autopsia di e hoben Elida Arteaga den otro medio di comunicacion, un autopsia haci na laboratorio di hospital Dr. Horacio Oduber.
Bon Dia Aruba a tuma contacto cu prome minister Evelyn Wever-Croes, ken a informa cu el a pidi na e dos minister envolvi tanto di area di Salud como di Husticia pa cuminsa haci un investigacion riba e leak di informacion medico asina delicado di un autopsia.
Mirando e envergadura di e caso aki, mas sigur MinisterioPublico of Seguridad Nacional Aruba lo investiga Hospital Dr. Horacio Oduber.
HOH ta reacciona riba informacion den medionan di comunicacion:
Hunta di Directiva di Horacio Oduber Hospital (HOH) a tuma nota di diferente articulo den medionan di comunicacion tocante e autopsia cu ta concerni un caso sumamente lamentabel. Un caso cu sigur tin un impacto grandi riba comunidad di Aruba y ta trece pregunta encuanto e sucedido.
Manera ya a splica diferente medionan di comunicacion, HOH a sinta cu e famia pa duna informacion y tambe a facilita pa e autopsia por tuma luga. Den cuadro di privacidad di pashent y cliente HOH no por duna mas informacion tocante e caso aki.
HOH kier enfatisa cu privacidad di nos pashent y clientenan ta sumamente importante y nos como dunado di cuido ta respeta esaki. Regularmente pa medio di diferente comunicacion interno y presentacionnan ta enfoca riba e punto aki cerca nos trahadonan y alabes ta splica e consecuencianan si en caso no respeta privacidad di tur pashent y cliente.
Por ultimo Hospital ta pidi pa respeta e privacidad di e famia, como tambe privacidad di tur pashent y cliente.
