Prome minister Evelyn Wever-Croes (MEP) ta na Hulanda pa varios bishita di trabou di cual e principal ta cu Rey Willem Alexander. Segun un comunicado cu nos a ricibi prome minister ta desmenti rumornan ‘falso’ cu un di su (ex) vigilantenan lo ta deteni.
‘Ta di lamenta’, Prome Minister ta bisa cu mientras e ta na Hulanda reestablece e confiansa entre paisnan bek, ‘oponentenan ta difundiendo cantidad di noticianan falso pa purba desvia atencion’. Lo tuma hopi pa gana e confiansa bek di e Hulandesnan. Y rumornan falso lo no bay stroba e mandatario pero si el a reacciona den corto pa aclarea e rumornan aki.
Prome minister ta biaha sin delegacion
Prome Minister ta aclaria cu el a biaha pa Hulanda su so, sin niun delegacion cu ne. Su casa ta compañ’e den e biahe pero e no ta parti di niun delegacion. Premier di Aruba ta trahando na Hulanda mientras su conseheronan ta na Aruba ta consehando e desde aki mes di oranan di madruga. Nan ta cla y pendiente pa duna conseho na tur momento di dia, segun e comunicado. “E Gobierno aki ta bahando gasto uzando technologia pa traha hunto enbes di biaha hunto.”
Prome minister ta desmenti cu persona deteni lo tabata den su team
Su reaccion riba e noticianan ta referi na e portal 24ora.com cu a trece den su plataforma di noticia online cu un di prome minister su body guardnan ta deteni. Prome Minister a enfatisa cu esaki ta un ‘noticia falso y hopi baho’. Segun e comunicado, e mandatario no tin body guard of vigilante. Sinembargo e comunicado ta duna di conoce cu durante campaña tawata tin hendenan cu a fungi como tal. Sinembargo e comunicado ta desmenti enfaticamente cu un di e personanan aki lo ta deteni. “No tin niun hende cu a campaña cu prome minister of cu tawata su bodyguard cu ta deteni of cu tawata deteni”. Den e caso aki, e plataforma di noticia en cuestion ta referi na un persona cu den pasado a campaña p’e hopi aña atras ‘pero sigur den e ultimo campaña no a campaña mas y no a forma parti di e team di prome minister’.
Caso traficacion di oro no a bay dilanti hues ainda
Si e persona aki lo ta liga na e partido no por determina te awo. Sinembargo nos a tuma contacto cu vocero di ministerio publico kende a confirma cu e persona cu portal 24ora.com ta menciona ta e di dos detenido den caso di traficacion di oro. OM ta investigando e caso actualmente, pero te ainda no a presenta esaki dilanti hues di prome instancia. Segun informacion di 24ora den maart ultimo e sospechoso aki su abogado lo a apela contra su detencion. Sinembargo nos a ricibi informacion di vocero di OM cu ta mustra cu abogado di e prome (otro) sospechoso den e caso ta esun cu a apela. Prome minister den e caso di e persona deteni a bisa pa ‘laga husticia core su curso’. Y manera semper e mandatario a indica, por medio di un expresion, cu ‘esun cu comete un eror, mester sinta riba su blaar’.
“Mi no a drenta politica pa perhudica niun hende y sigur no pa sali na defensa di un of otro persona cu ta comete eror. Den e caso aki ta conta mesun cos. Pa mala suerte di e noticia aki y di 24ora.com, ami no tin ningun body guard cu ta deteni tampoco niun hende cu a campaña pa mi ta deteni awo of a ser deteni. Esaki ta un rumor falso di nos oponentenan mustrando nan desesperacion. Nan sa cu mi ta na Hulanda. Nan sa cu mi tin mester di tur atencion pa gana confiansa bek di e Hulandesnan. Cu e noticianan falso aki nan ta purba di desvia mi atencion. Pero nan lo no logra.”
Preguntanan di parlamentario
2 luna pasa Bon Dia Aruba a publica un comunicado unda parlamentario Robert Candelaria lo a manda un serie di 14 preguntanan dirigi na prome minister tocante su relacion cu e sospechoso aki. Nos a purba haya contacto cu e parlamentario riba esaki en caso cu prome minister a contesta e preguntanan pero nos no a logra cu esaki. Un di e preguntanan tabata cu si prome minister por splica su relacion cu e sospechoso. Bon Dia lo ta acercando e parlamentario pa mas informacion y tambe lo haci pregunta na prome minister ora cu e bolbe di su biahe di trabou.
