A traves di un comunicado di prensa oficial, Prome Minister, Evelyn Wever-Croes a informa cu a yega na acuerdo cu Hulanda pa loke ta trata cambionan den ley di LAft y cu Gobierno di Aruba ya a manda e ley aki Parlamento.
Pa algun dia caba, tanto Bon Dia Aruba como otro medionan di comunicacion a bin ta reporta ariba e tema di LAft, y Secretario di Estado pa Relacionnan di Reino, Alexandra van Huffelen tambe a anuncia e noticia cu Aruba y Hulanda a yega na un acuerdo ariba e topico aki na medionan di comunicacion Hulandes diabierna ultimo.
A pesar di confirmacion di Secretario di Estado, Prome Minister di Aruba no a confirma oficialmente e acuerdo aki. Diabierna ultimo, reportero di Bon Dia Aruba a acerca Prome Minister pa confirma si en berdad e noticia aki tabata corecto, y Prome Minister a indica cu ainda nan tabata en espera di confirmacion di Den Haag.
A traves di e comunicado di prensa ayera, Prome Minister a confirma e acuerdo pa e cambionan den e ley di LAft y cu a manda e ley aki pa Parlamento caba. E cambionan aki mester ta aproba y na vigor entrante 1 di januari 2024. Loke a keda pendiente ainda ta un acuerdo tocante un ley di supervision financiero (RAft), pa cual lo continua e discusion entre e dos gobiernonan.
“Despues di e deliberacionnan cu Hulanda durante e ultimo simannan, manera a keda aproba den Conseho di Minister di Reino di dia 27 di october ultimo, Aruba y Hulanda a yega na acuerdo riba e cambionan di LAft,” e mandatario a indica den e comunicado.
Manera ta conoci, LAft ta e Ley di Supervision Financiero cu ta duna e cuadro legal na e Colegio di Supervision Financiero (CAft) pa haci trabao di supervision financiero na Aruba. E ley di LAft aki tabata anticua y no tabata contene e normanan recien, pero cu e cambionan cu a wordo presenta na Parlamento ayera, e normanan ta actualisa.
Pa loke ta e normanan aki, Prome Minister a splica cu Aruba ta bay di un norma pa tres norma cu ta inclui den e cambio di ley aki. E prome norma ta cu Aruba mester tin un surplus di por lo menos 1% tur aña. E di dos norma ta cu e gastonan di personal no por surpasa e 10% di GDP anual, cual ta un meta cu mester logra pa aña 2027. Y e di tres norma, e porcentahe di debe di pais Aruba den GDP mester yega na 50% na aña 2040.
“Tur tres norma ta normanan realistico y ya caba Gobierno di Aruba ta trahando riba nan desde aña 2017 cu Gabinete Wever-Croes I a drenta den Gobierno y lo continua traha den e direccion aki. Cu esaki ta trece Aruba riba nivel di finanzas publico sostenibel”, Prome Minister a enfatisa.
Den nos edicion di 27 di november, a publica un articulo den cual ta splica cu segun CAft, gobierno no ta cumpliendo cu un di e normanan di e protocol, en bista di e aumento den e presupuesto modifica, compara cu aña 2022.
Segun e norma, e gastonan nominal mester ta baha aña tras aña, loke no ta e caso. CAft ta conseha gobierno pa tuma e medidanan corespondiente pa logra cumpli cu e norma.
Na 2022, gasto di personal tabata na Afl. 426 miyon. Cu e coreccion pa e reduccion salarial, e gastonan di personal na 2022 tabata Afl. 465 miyon y pa 2023 tabata aparece den e presupuesto original na Afl. 460 miyon. Segun e presupuesto nobo modifica, e gastonan salarial a aumenta cu Afl. 7 miyon te Afl. 467 miyon, mas tanto pa via di aumento di compensacion pa overtime (4 miyon), y gasto di personal relaciona cu e ‘Landspakket’ (Afl. 2 miyon).
Luna pasa, Prome Minister a indica cu Hulanda na ultimo momento, a bin cu tres condicion nobo, un cu tabatin di haci cu e proyectonan PPP (Proyectonan Private-Public Partnership). El a splica cu Hulanda kier pa Aruba prohibi e proyectonan aki completamente, mirando cu e decisionnan di Gabinete Mike Eman a tuma pa cu e proyectonan PPP, a causa Aruba hopi daño financiero.
El a agrega cu Aruba a tuma tempo pa negocia e parti aki, sinembargo Hulanda no kier a cambia su posicion y a keda exigi pa prohibi e proyectonan PPP. “Gabinete Wever-Croes 1 ni 2 a cera PPP y no tin pensa di cera PPP manera e gobierno di AVP a cera. Sinembargo, Hulanda su temor ta si den futuro bin un otro gobierno manera di AVP cu atrobe lo tuma decisionnan ekiboca pa finanzas di nos pais,” el a splica.
Na final di e negociacionnan a logra yega na un acuerdo pa loke ta e punto aki tambe y pues a manda e ley pa Parlamento di Aruba. Bon Dia Aruba a puntra prome minister si, mirando cu a manda e ley Parlamento, por asumi cu ya a ricibi conseho di Raad van Advies. Wever-Croes a contesta: “Si. El a bay RvA prome cu nos a mand’e Hulanda. Dia 31 di augustus nos a mand’e Hulanda hunto cu e conseho di RvA.”
Aruba y Hulanda a logra yega na un acuerdo ariba e cambionan den LAft pa supervision financiero den 2024, pero pa loke ta trata e RAft, Gobierno demisionario di Hulanda tin un mandato pa sigui negocia cu gobierno di Aruba tocante introduccion di un ley di Reino pa supervision financiero, pa cual no tin un fecha limite determina.
Mientras cu no tin un acuerdo ariba e tereno aki, Aruba lo mester paga e interes di 6,9% riba e prestamonan di 2020. Esaki por bira 5,1% na momento cu tin un acuerdo encuanto e forma y contenido di un ley di Reino. Na momento cu tin un ley di Reino vigente, Aruba lo por haya un interes di 3,2%.
Gobierno Hulandes a expresa su disposicion pa considera e modelo ‘hibrido’ cu Aruba a propone. E modelo ta encera un propuesta di reparti aspectonan di supervision financiero entre un ley di Aruba y un ley di Reino.
No tin detaye conoci con e reparticion lo por ta. Tampoco tin indicacion cu e negociacion ta avansando. Despues di un acuerdo ainda por dura bastante tempo pa un ley di Reino haci e recorido legal necesario y te e tempo ey Aruba lo no mira e porcentahe mas faborable bira realidad.
