Recientemente nos prome minister Evelyn Wever-Croes (MEP) tabata na Corsou pa asina trata e tema social. Esaki tabata hunto cu minister di Asuntonan Social, Labor y Bienestar General di Corsou, esta Hensley Koeiman.
Sr. Koeiman a entrega e ‘Plan Nacional di Corsou pa combati violencia contra mucha/hobennan y violencia domestico/relacional’ na prome minister Wever-Croes, den cual ta describi resultadonan di investigacion haci na Corsou tocante violencia domestico. Tambe e plan cu ministerraad di Corsou a aproba siman pasa pa cuminsa atende cu e problemanan social, segun e comunicado ricibi di gobierno.
Di su banda sra. Wever-Croes a comparti e tema di e Crisisplan Social, prepara pa e expertonan riba tereno social na Aruba, y con esaki ta incorpora den e presupuesto pa 2018 y 2019.
“Problemanan social na Aruba no ta diferencia demasiado di esunnan na Corsou. Hunto por combati e problemanan social mas efectivamente. P’esey mi ta contento di por a intercambia di ideanan cu minister Koeiman”, prome minister Wever-Croes ta finalisa.
