Riba e di dos dia na Nacionnan Uni, Prome Minister Evelyn Wever-Croes a atende varios reunion, y a papia na diferente conferencia, treciendo punto di bista di Aruba y di Reino padilanti, di kico Gobierno ta haciendo na Aruba y unda e isla mester di mas atencion.
Prome Minister den un comunicado di prensa a indica cu na Aruba, compara cu otro paisnan presente na Nacionnan Uni, e posicion di hende muhe ta hopi bon. Gobierno ta consciente si cu tin espacio pa mehoracion, y lo traha riba esakinan tambe. Pa por yega na un nivel di igualdad, Gobierno lo traha riba empodera nos muchanan muhe mas, pa asina nan tin mas oportunidad den bida. Tambe lo guia nan y duna nan e informacion necesario, cu e meta pa crea interes den nan pa sigui nan educacion den e area di STEM, cu ta e area tecnico, garantisando asina mas oportunidad laboral den futuro. Gobierno lo traha tambe na empodera e mucha muhenan cu mas oportunidad economico, y traha riba proteccion di e ser femenino contra abuso y violencia.
Durante e reunionnan na Nacionnan Uni, Prome Minister a haya di UN Women, e resultado di e revision cu nan a haci di e sistema na Aruba, y nan a duna e puntonan, na unda nan ta wak cu por bin mehoracion. Prome Minister a indica cu e bon di tur esaki ta, cu UN Women ta dispuesto pa yuda Aruba y a duna fondo pa cu esaki.
“Mi dianan na Nacionnan Uni ta yena di informacionnan valioso, y hopi inspiracion. Cu esaki mi lo bolbe Aruba, cu e compromiso, pa sigui traha pa mehora e posicion pa nos muchanan muhe, y hendenan muhe na Aruba”, Prome Minister a expresa.
