(AP) — Prome minister Spaño, Pedro Sanchez ayera a convoca un eleccion general adelanta pa dia 23 di juli den un movida sorpresa despues cu su partido Socialista a ricibi un golpi serio den eleccion local y regional.
Prome cu e debacle diadomingo, Sanchez a insisti cu e lo completa su di termino di cuatro aña cu partner di gobierno di coalicion, Unidas Podemos, indicando cu lo por tene un eleccion na december. Pero e resultado di e voto regional y local rapidamente a trece cambio. “Mi a tuma e decision aki mirando e resultado di eleccion di ayera,” Sanchez a bisa ayera for di palacio presidencial Moncloa.
E problemanan pa Sanchez y su partido PSOE ta yega mientras Spaña ta programa pa asumi e presidencia rotativo di Union Europeo dia 1 di juli.
Sanchez a bisa cu el a papia cu Rey Felipe VI y lo tene un reunion special cu Gabinete ayera pa disolve parlamento. E fecha scogi pa eleccion adelanta ta yega memey di e vakantie di berano na Spaña, cu hopi hende probablemente leu di nan area di votacion.
E eleccion local y regional diadomingo a mira Spaña bolter na banda drechi y a haci e conservador lider den oposicion, Partido Popular (PP) e principal forsa politico na e pais.
PP, lidera pa Alberto Nuñez Feijoo, a gana den siete di e 12 region y a domina varios region anteriormente gana pa PSOE incluyendo Valencia, Aragon y La Rioja. Ainda mester wak con hopi PP lo haya su mes forsa pa depende riba partido di ultra-derecha Vox pa forma gobierno regional y local.
PP tambe a gana mayoria absoluto den region y capital di Madrid, cu Isabel Diaz Ayuso reeligi como presidente regional di Madrid. Gobiernonan regional na Spaña tin poder enorme y discrecion presupuestario riba educacion, salud, vivienda y seguridad.
