Prome minister: “Secresia di voto ta algo cu ta sagrado y ni un hende ta bay mishi cu esey”

Ultimo dianan, comunidad a bin presentando cierto preguntanan y dudanan pa loke ta trata e proceso di votacion cu lo tuma luga e proximo dia 25 di juni.

Tocante esaki prome minister Evelyn Wever-Croes a sigura cu oponentenan politico ta haciendo un sensacion di esaki y cu “piensa el ladron que todos son de su condicion”, el a enfatisa cu e gobierno aki ta respeta e sistema democratico, loke ta e “secresia di voto ta algo cu ta sagrado y ni un hende ta bay mishi cu esey”, el a sigura.

Asina mes el a splica cu ora el a drenta na gobierno na aña 2017, un di e prome evaluacionnan tabata e ekipo cu e atende cu eleccion na september 2017 cu segun el a expresa nan a trece asina tanto ponencia di iregularidadnan cu e mes a spanta y cu politiconan di partido AVP tabata mete den proceso di eleccion.

Na momento cu nan a drenta gobierno, el a afirma cu nan a cambia e sistema y nan a pone tur cos back den man di Conseho Supremo Electoral cu ta un entidad totalmente independiente y ta wordo regi, supervisa y goberna pa Corte di Husticia y Algemene Rakenkamer y no Gobierno di Aruba.

Gobierno di Aruba ta asisti nan cu fondo pa nan haci nan trabou manera mester ta, el a bisa cu nan a traha un rapport cu a wordo publica y presenta na parlamento cu tur iregularidad, den e lista a wordo inclui digitalisacion cu ta parti di innovacion y cu nan a cuminsa busca fondonan pa asina Conseho Supremo Electoral por haci algo diferente den aña aki.

Pero ora pandemia Covid-19 a yega na Aruba e fondonan no ta disponibel pa esey y nan a reuni pa haci cierto adaptacion prome cu eleccion.

Ademas, el a bisa cu nan a entrega esaki na parlamento algun siman atras y prome minister a sigura cu director di Censo, esun encarga di organisacion pa Conseho Supremo Electoral, a duna algun declaracion pa prensa -cierto medionan di comunicacion, no tur- y cu e declaracion a wordo mal interpreta.

Segun declaracionnan cu a wordo haci na un otro medio di comunicacion e voto no lo keda secreto mas, “pero esey no ta e caso” prome minister a aclaria y cu otro siman presidente di Conseho Electoral lo duna un conferencia di prensa pa asina trece dilanti un splicacion tocante e proceso electoral.