Prome minister di Corsou Eugene Rhuggenaath a cancela su vuelo anteriormente confirma den cuminsamento di siman.
E premier a spera cu e lo por bin na acuerdonan cu su coleganan Mark Rutte y Raymond Knops tocante coopera riba un plan pa trece ordo den gobierno su finanzas, profesionalisa aparato gubernamental y alabes pa reforsa economia. Tabatin deseo pa bin cu tal acuerdo di banda di e nacion Caribense, asina preveniendo cu conseho di minister di Reino lo emiti un aanwijzing pa forsa Corsou pa bin cu medida drastico pa drecha e situacion.
Sinembargo e deseonan a keda te ey ora cu prome minister Rhuggenaath a tende di Hulanda cu conseho di minister di Reino lo dicidi dialuna proximo sigur di emiti un aanwijzing. Den e conseho di minister di Reino e ministernan Hulandes tin un mayoria compara cu e ministernan di e islanan di Reino, cual ta nifica cu nan por dicidi kico e conseho aki ta haci.
Ya pa par di luna tabatin rason pa dicidi di emiti un aanwijzing: Colegio di supervision financiero (CFT) a conseha gobierno Hulandes pa haci esaki den nan conseho di 1 april. Conforme e conseho CFT kier pa Corsou bin cu medidanan mas drastico di loke ya caba gobierno Curasoleño a bin cune. Gabinete Rhuggenaath tin miedo cu por medio di e medidanan aki e restauracion di economia lo bin na un stop abrupto ademas di percura cu pueblo no lo confia mas den e gabinete.
