Prome minister Eugene Rhuggenaath ta bisa cu e ta lamenta cu e impasse den Parlamento mester a termina cu Hulanda involucra. E premier a bisa esey despues cu a keda conoci cu durante un reunion den Conseho di Minister di Reino (RMR) a dicidi di impone un Medida General di Administracion di Gobierno (aanwijzing).
Di e forma aki, Emmilou Capriles mester por drenta parlamento. Segun Rhuggenaath, RMR a procede na haci esaki despues cu Gobernador Lucille George Wout a acerca e conseho cu un peticion pa intervencion.
Dies biaha den ultimo periodo no tabata posibel pa forma quorum, cu ta nifica cu reunionnan parlamentario no por a tuma luga. E miembronan di oposicion semper a scoge conscientemente pa no ta presente durante e reunionnan.
Siman pasa, Rhuggenaath a indica cu e tabata kier solicita ayudo di RMR pa yega na un solucion. Pero despues di cantidad di protesta di tanto politiconan como comunidad, e prome minister a dicidi di no haci e solicitud.
“E consideracion pa involucra Conseho di Minister di Reino (Rijkministerraad, RMR) a bin di e necesidad cu nos como gobierno tin pa parlamento funciona. Esey no ta e caso pa un tempo largo y esey mientras nos ta den un crisis. Tin asuntonan urgente cu mester di atencion y tin ley cu mester adresa”, e prome minister a bisa.
Segun Rhuggenaath, sinembargo, Gobernador ta autorisa pa haci e solicitud di su mes. Rhuggenaath: “Gobernador recientemente a observa e situacion y tabata preocupa pa esaki. Pa e motibo aki ami ta compronde su decision completamente pa solicita intervencion di RMR.”
“Ta un lastima cu pa falta di madurez nos no a logra resolve esaki internamente, pero na final democracia di Corsou a bolbe gana”, Rhuggenaath a finalisa.
