Awe den oranan di anochi den e conferencia di prensa cu minister presidente, Evelyn Wever-Croes ta duna den e periodo aki di COVID -19, el a informa cu Hulanda tin e capacidad financiero pa atende cu diferente necesidad, pero Aruba no. Ademas Departamento Social ta esun mas prepara pa atende cu bijstand.
Paisnan como Hulanda ta subsidia empresarionan te cu 90% di e salario di empleadonan y na islanan BES te cu 80% di e salario. Tocante esaki, minister presidente a expresa cu e comparacion di Aruba cu Hulanda pa locual ta brinda asistencia, e no ta kere cu esey ta sinta den si ta necesario of no; esaki tin un diferencia enormemente grandi pa motibo cu e potencial cu Hulanda tin financieramente pa yuda no ta mescos cu esun cu Aruba tin.
Den e momentonan aki, Wever-Croes a bisa cu ya caba a duna algun informacion di asistencia di alivio financiero cu nan ta bay duna como gobierno, pero nan no tin e placa p’e ainda. “Nos tin cu busca e placa” el a sigura.
Asina mes, el a afirma cu si nan tabatin e capacidad financiero di Hulanda y para bon igual cune, nan tambe lo por subsidia 90% of 100% talbes.
Di loke ta trata si Departamento Social ta e mas ekipa pa atende cu bijstand, el a señala cu na e momentonan aki e ta esun cu ta administra esey. Tambe tin un plataforma institui pa minister Glenbert Croes, cu ta consisti di diferente instancia cu ta bay atende cu esey.
Asina mes, el a menciona cu e ta kere den tur experto cu ta trahando hunto cu Croes y minister Maduro cu lo por atende cu e situacion.
