Minister President Mike Eman ta bisa cu e ta consciente di otro aspectonan cu a bin dilanti awor cu e derame di azeta menasando nos costanan. El a indica cu ta bay atende cu nan ‘debidamente den un proximo fase, un bes cu e situacion normalisa’.
Pero cu ‘sigur lo bay enfoca riba e responsabilidad y tambe riba preparacion y prevencion den e industrianan local’, asina e prome ministro ta bisa.
“Tin hopi pregunta cu ta lanta rond di henter e tema aki cu por ta nos tin cu bin bek riba nan den futuro. Na e momento aki nos kier concentra riba e aspecto logistico y kico nos tin cu haci pa haci e areanan limpi. Temanan un tiki mas internacional di responsabilidad, di paisnan cu ta maneha e volumen aki di crudo, cu por cambia e destino di un pais di un dia pa otro; por ta esaki ta un momento atrobe cu toch comunidad mester para keto y pensa riba e tema aki den un sentido mas fundamental.”
Advertencia chikito
“Sigur nos lo bin bek riba e tema aki. Nos por bisa cu esaki por ta un advertencia chikito cu nos por maneha y por ta nos mester tum’e asina y usa e experiencia aki pa tuma precaucion y laga nos bos resona den nos propio pais, unda cu nos tin e temanan aki tambe; paso nos tin un refineria y nos tin exploracion di gas ta bay tuma luga den nos subsuelo panort di Aruba. Toch temanan cu ta haci loke a sosode awe importante pa nos para keto na nan y mira cu nos ta haci lo maximo pa proteha nos pais y futuro generacionnan,” segun sr. Eman.
