Prome minister Mike Eman no kier comenta riba e documentonan cu a sali di un contract pa digitalisa proyectonan di gobierno y comunicacion via social media.
E documentonan cu a lek ta mustra un contracto unda e compania Social Pop Aruba ta duna cierto servicionan pa un suma di 14.900 dollar pa luna (26.000 florin) pa un periodo di 6 luna. E periodo ta core di 16 maart te 30 september. Mientras e contract ta firma 26 di april.
Bon Dia Aruba a puntra prome minister dicon a desvia di e reglanan di ley di Contabilidad. Sumanan asina ta rekeri un destaho publico. Tin motibonan legal pa desvia di e reglanan por ehempel, den e caso no tin otro compania sea experticio cu por duna e servicionan ey. Pero den e caso di digitalisacion y social media, esaki no ta conta. Na Aruba tin hopi compania cu ta specialisa den esaki. Pa motibo di esey nos kier sa mas riba e motibo di gobierno pa haci e excepcion aki. Pero manera menciona e prome minister no kier comenta.
Banda di esaki nos a mira den e registro di Camara di Comercio (KvK) e compania cu a haya e contract, ta uno hopi nobo. E compania aki Social Pop Aruba a wordo lanta 1 di maart awor y por mira cu Chris Lejuez solamente ta menciona como e manager director. Pero e mes no a firma e contracto cu premier Eman, pero Juan Sebastian Saldarriaga. Esaki tin su consecuencianan huridico como sr. Saldarriaga no ta e representante legal di e compania. Pa motibo di esey nos tambe a puntra dicon gobierno a opta pa tuma servicio di e compania aki specifico.
Como cu di sr. Saldarriaga ta conoci cu e ta yuda tambe den campaña di AVP pa eleccion, nos a ricibi señalnan cu esaki ta trata di un fabor politico. Nos tambe a pidi prome minister pa un reaccion riba esaki, pero tampoco a haya un contesta.
