Esey ta parti di e declaracion cu e mandatario a haci durante un bishita oficial diahuebs 3 di april na Aeropuerto Internacional Reina Beatrix, pa haya un presentacion di e prome fase (1A) di e proyecto Gateway 2030. Prome Minister Eman a subraya e rol vital di Schiphol Group den e creacion y ehecucion di e proyecto, enfatisando cu su gabinete ta traha pa reestablece y fortalece e laso strategico cu Schiphol Group, cu a yega na un punto debil den ultimo añanan.

Schiphol Group: Aliado Strategico

Schiphol Group ta un lider mundial den maneho di aeropuerto cu a proporciona supervision tecnico y experiencia specialisa desde e etapa inicial di desaroyo di Gateway 2030, te na e implementacion sofistica cu Aruba ta celebrando awe. “Sin e conocemento y direccion cu Schiphol Group a ofrece, e proyecto Gateway 2030 lo a bay dificil,” Emana indica.

 

Segun un comunicado di gobierno, e meta di Gabinete AVP-FUTURO ta pa gana back e confiansa y compromiso di un socio crucial den e mundo di aviacion, pa sigura cu Aruba por sigui beneficia di e experticio y red global cu Schiphol por ofrece.

Bou liderazgo di Mike Eman, e gobierno actual ta pone enfasis back riba colaboracion internacional, infrastructura sostenibel y calidad den servicio publico, e comunicado ta indica. E reactivacion di e relacion cu Schiphol Group ta un paso den e direccion corecto pa consolida Aruba su posicion como hub regional den aviacion y turismo.

Disputa cu Schiphol Group
 Tabata januari ultimo cu noticia a circula den prensa local indicando cu Schiphol Group tabatin intencion di bandona Aruba. E tempo aya, a keda reporta cu e relacion entre Aruba y Royal Schiphol Group tabata bao presion significante. E conflicto entre e gabinete demisionario di Prome Minister Evelyn Wever-Croes (MEP) a alcansa un punto critico, cu Schiphol Group menasando di bandona Aruba na juni proximo.

Esaki a keda reporta riba portal noticiero Aruba.nu. Segun e relato, e tempo aya Mike Eman a expresa preocupacion pa e impacto potencial cu e retiro di Schiphol Group lo tin riba e posicion economico y strategico di Aruba.

Desde april 2004, Royal Schiphol Group, propietario y operador di aeropuerto Schiphol na Amsterdam, a mantene un relacion strategico cu Aruba Airport Authority (AAA), cu ta maneha Aeropuerto Internacional Reina Beatrix. A traves di e colaboracion aki, Royal Schiphol Group ta provee management y sosten tecnico na aeropuerto di Aruba.

Segun e relato di Aruba.nu, den un carta manda december ultimo, Schiphol Group a anuncia su intencion pa termina e acuerdo, citando un relacion afecta severamente cu gobierno di Aruba. Eman a atribui e conflicto aki na e awo ex-minister di Turismo, Dangui Oduber (MEP), acusando e minister e tempo aya di permiti pa e conflicto escala. E ta nota cu e relacion aki tabata estableci na 2004 pa un gobierno anterior di MEP, lidera pa Nel Oduber.

Di su banda, Dangui Oduber a tuma nota di e relato cu a aparece riba rednan social y den medionan di comunicacion local na januari, y a reacciona riba su su pagina di Facebook. El a aludi na e hecho cu lo tin motibonan hopi serio pakico e relacion cu Schiphol Group no por a continua.

“Lo ta bon pa co-formador Eman splica tambe kico ta e condicionnan cu Schiphol a pone pa nos cu a conduci na e patstelling cu negociacionnan a tranca! Un patstelling similar na e negociacion entre AVP y Futuro,” e minister a indica. “Si e no kier splik’e cu gusto lo mi splica cu tur luho y detaye pakico NO por acepta e condicionnan di Schiphol cu ta bay hopi leu!”