Pa hopi aña e pensionadonan di Setar no a ricibi nan pago despues di a baha cu pension, y esaki a pone cu nan a rabia y a bay corte. Pero na diferente ocasion e caso a wordo posponi. Na final despues cu e caso a tuma luga, e pensionadonan di Setar a gana esaki. Awo un biaha mas nan ta pasa den dilema ya cu nan no ta tendiendo nada riba e parti cu nan mester wordo paga. E pensionadonan kier sa kico ta pasando, ya cu nan ta desea di sa si nan lo wordo paga.
Prome Minister, sr. Mike Eman, a indica cu durante un di e dianan aki lo tuma luga un reunion cu Setar riba e tema di e pago na e pensionadonan cu a gana nan caso. E tema aki tin e atencion di gobierno. “Den pasado nos tabata tin e sentimento cu ta bon pa cera e capitulo aki,” segun e mandatario.
Di parti Setar tabata tin cierto preocupacion pa e sumanan envolvi. Pero ya caba tin diferente veredicto cu ta indica cu ta trata di un derecho. “Mi ta spera tanto e derecho y tambe e situacion cu e personanan aki den incertidumbre a pasa aden durante e periodo lo pisa tambe. Naturalmente di e gastonan envolvi cu tin biaha ta e motivacion pa sigui cu e caso pa mira si por sali un caso mas faborabel pa Setar,” segun Prome Minister. Pero na otro banda e tin cu bisa asina mes na cierto momento e personanan cu ya ta riba pension, ta biba hopi tempo caba den e expectativa aki, tin algun caso den corte caba cu ta na nan fabor. “Nos lo drenta den e reunion cu mente hopi habri. Y cu simpatia tambe pa cu e situacion di e ex empleadonan,” el a indica.
Core den miyones
Tin un bista riba cuanto mester paga, pero e Prome Minister ta kere cu e suma di pago ta core den miyones. E biaha aki por tin acumulacion, pero gobierno lo bay scucha di Setar kico e suma exacto lo ta. Tambe lo scucha di e compania con nan ta mira e situacion y hunto cu Setar, como accionista, por yega na un decision pa cu e situacion aki cu ta durando hopi tempo.
Fondo
A puntra Prome Minister si Setar no tin e fondonan pa paga e suma aki, con esaki lo wordo paga. Sea e suma lo wordo parti entre Setar y gobierno, of si gobierno lo mester facilita esaki. “Semper SETAR tin mas fondo cu gobierno. Mi no ta kere cu esey lo mester ta e caso. Simplemente cu tur fondo cu bo aloca pa un cos, e ta bay a costa di un otro cos, inversionnan, innovacion di Setar. Pero mi ta kere cu esey naturalmente ta un tema, pero e otro tema ta e derecho di e personanan aki cu den mas di un ocasion a wordo confirma den corte di husticia,” el a sigui bisa.
