Diabierna siman pasa despues di huramentacion di Gabinete AVP-FUTURO, ministernan recien huramenta tabata den Parlamento di Aruba pa contesta pregunta tocante presupuesto nacional 2025 y e nota di cambio cu fraccionnan AVP y Futuro a entrega. Prome minister nobo, Mike Eman, a ricibi varios pregunta y un di esunnan mas ripiti ta relaciona cu e aumento di reparatietoeslag pa pensionadonan.
Minister Eman a remarca cu varios parlamentario a haci e pregunta tocante e hecho cu den e periodo prome cu nan a drenta gobernacion a menciona continuamente e cifra di 700 florin como un meta principal di aumento cu nan kier realisa pa e reparatietoeslag.
El a splica cu e cifra aki no a cay gewoon un dia, pero ta un cifra cu a ser midi a base di e bestaansminimum cu tin na Aruba. “Ora nos a haci calculacion di e entrada averahe di esnan cu ta riba un pensioen a mira cu tin un deficit enorme, y den cierto caso riba mil florin, entre loke un pensionado mester y locual un pensionado ta hayando na e momentonan aki,” el a indica.
El a sigui splica cu nan sa cu e deficit aki nan no por cer’e di un dia pa otro pasobra el a crece durante e hopi aña. El a recorda cu na 1994 ex prome minister Henny Eman a haci un di e cambionan di mas grandi cu Aruba a yega di conoce den pensioen redoblando e pensioen di e pensionadonan.
E mandatario a indica cu e tempo ey tambe e aumento aki tabata basa riba un estudio cu a ser haci di e pensioen versus e bestaansminimum di Aruba. E mesun aña ey, el a sigui indica, e prome minister e tempo ey a percura pa e prome investigacion di e bestaansminimum di Aruba pa asina acopla e pensamento cu e pensioen mester por yega mas cerca posibel di e bestaansminimum.
Minister Eman a remarca cu pa e motibo ey tambe durante su gobernacion na 2011 nan a introduci un pensioen banda di e AOV caminda tur hende cu ta traha den sector priva ta bay construi un pensioen tambe den sector priva pasobra, segun el a señala, “e ta dificil pa keda mantene e pensamento cu AOV semper por yega e bestaansminum.”
P’esey tambe, el a menciona, cu a introduci e reparatietoeslag pa cuminsa percura pa e pensioen no cay atras, pa e no bira un peso riba e fondo di pensioen y asina a logra cu awe ta topa personanan cu banda di e AOV ta haya extra for di un compania di seguro of otro. El a indica cu no ta hopi ainda pasobra algun aña ta bezig ta construi, pero aki 10 pa 20 aña e AOV combina cu un fondo di pensioen priva di un compania di seguro lo haci un cambio dramatico den entrada cu e ciudadanonan tin.
“E tema aki nos a bin ta carg’e pa hopi aña caba cu preocupacion special pa nos grandinan y asina crea no unicamente e fondo di pensioen priva, a crea e reparatietoeslag, a redobla e pensioen den pasado, pero a percura tambe pa e fondo di pensioen manera cu e tabata di AOV cu tabata den situacion precario, cu a haci e reformanan cu tabatin mester, cu p’esey e fondo ta solido awe. P’esey e fondo di APFA ta solido awe kiermen e compromiso di nos cu e pensioen di nos grandinan ta uno cu ta bay hopi decada atras y ta uno cu pruebanan hopi palpabel di kico tur nos a haci pa nos hendenan,” el a enfatisa.
Riba e pregunta si nan ta bay alcansa e 700 florin cu nan menciona, minister Eman a splica cu si e prome dia di gobernacion ya caba nan por a pone 250 florin, el a sigura cu comunidad por mira den direccion di e gobierno aki cu confiansa grandi cu e compromiso pa yega e suma aki ta uno cu tur minister ta carga den e gabinete y cu nan tur lo bay traha riba dje.
El a indica cu tin dos pa tres factor cu ta duna nan e optimismo cu nan ta bay alcansa e cifra menciona. Uno ta cu den e prome ronda di e aumento di reparatietoeslag nan no a haci un inkomentoets. Esaki, el a splica, ta pasobra nan ta sinti cu tur hende practicamente a bay atras e ultimo añanan aki, inflacion tabata hopi halto y por mira cu e deficit entre e bestaansminimum y pensioen a aumenta, kiermen e aumento ey ta conta pa tur hende cu tabata necesario.
Pa e motibo ey den e prome ronda aki a scoge pa tur persona cu ta ricibi un pensioen haya e 250 florin adicional di pago di ayudo di sosten financiero.
E mandatario a splica cu e inkomentoets ta bay haci cu e siguiente momento cu nan ta bay haci un aumento atrobe di reparatietoeslag pa subi ainda mas e pensioen di e pensionadonan, e grupo cu nan lo tin cu yuda e momento ey probablemente lo ta mas chikito pasobra ora haci inkomentoets mas placa lo ser dirigi na esunnan cu tin unicamente un AOV of cu tin AOV corta. “Nos ta sigur den e temponan cu nos ta bay tuma pa cada bes haci e ahuste aki cu nos ta bay yega e suma aki sigur,” el a subraya.
E otro punto hopi importante cu minister Eman a menciona ta e formalisacion di esnan indocumenta. El a splica cu na e momentonan aki esaki ta bay tin un impacto grandi riba entrada den comunidad.
A pesar cu nan no tin cifranan concreto, por haci un calculacion cu si tin entre cinco mil y dies mil persona indocumenta y nan cuminsa paga nan prima di AOV y AZV, y paga loonbelasting ta bay mira cu entrada di pais Aruba ta bay subi y asina haya un poco mas espacio financiero, kedando den norma, pa por sigui aumenta unda cu mester aumenta e reparatietoeslag. “E no ta keda unicamente na nos pensionadonan, nos a cuminsa cu esey, pasobra for di oposicion ta dificil pa mira for di unda por aloca mas entrada pa keda den e normanan y haci locual bo mester haci, pero tambe esnan cu salario minimo na cierto momento mester ser yuda cu aumento di reparatietoeslag,” el a agrega.
E di tres factor el a indica ta for di e mundo di turismo. El a splica cu durante reunionnan como formador a tende caba di e Airbnb’s y nan a tende for di e asociacion mes cu ta representa e Airbnb’s cu tin un grupo na e momentonan aki cu no ta riba e radar di belastingdienst y pa e motibo ey no ta hayando e entradanan completo cu e pais mester haya di Airbnbs.
El a sigui splica cu si pone nan riba radar cu algun cambio legislativo cu mester haci cu ta obliga cada un pa ta menciona como Airbnb, na e momento ey ta bay aumenta e cumplimento y esey tambe lo trece placa adicional cu ta duna mas entrada pa por haci e cosnan cu gobierno tin cu haci, entre otro aumento di reparatietoeslag pa e pensionadonan y diferente otro inversion.
“Tur locual nos ta buscando na fondonan adicional no lo sali for di un peso riba nos comunidad, manera BBO cu ta aumenta of BBO na frontera, pero lo sali for di fuentenan caminda cu na e momento aki nos ta sinti tin hopi ganashi, pero no ta ser traduci suficientemente den contribucionnan pa pais Aruba y eynan ta unda nos lo kier busca tambe pa aumenta e suma di 250 florin pa e yega na e suma cu nos a menciona,” e prome minister a enfatisa.
