Despues di huramenta como prome minister di Aruba diabierna 28 di maart, un di su prome ordennan a bin den su calidad como minister di Naturalesa. E mandatario a duna informa DOW pa no inicia cu e trabounan di asfaltamento di e caminda pa yega Secrets Hotel pa motibo di condicionnan importante pa proteccion di naturalesa.

Diabierna 28 di maart a traves di nan pagina di Facebook DOW Aruba a anuncia cu ayera 31 di maart lo mester a cuminsa cu trabounan di mantencion riba e caminda pa Hotel Secrets na Sero Colorado. E trabounan aki segun e publicacion lo mester dura te cu 16 di mei 2025 mas o menos y orario di trabou lo tabata di 8’or di mainta te 4’or di atardi.

Pero di huramentacion di Gabinete AVP-FUTURO, e trabounan aki a keda suspendi bou orden di prome minister y minister di Naturalesa, Mike Eman.

Segun e noticiero local Noticia Cla a reporta, riba su prome dia di trabou durante fin di siman e mandatario, den su calidad di minister di Naturalesa, a informa DOW cu e caminda cu nan lo mester a cuminsa asfalta ayera 31 di maart pa yega na Hotel Secrets lo no por sigui prome cu algun condicion importante pa proteccion di naturalesa ser stipula.

Eman a cuminsa su trabou como minister di Naturalesa enfrentando un reto relaciona cu e planning di DOW pa loke ta trata e trabounan pa pone asfalta riba e caminda pa por yega Secrets Hotel na Sero Colorado.

E portal di noticia a indica cu Eman a haya un conseho for di Fundacion Carmabi, data 27 di maart 2025, cu ta bisa cu e “ontheffing” pa kita e matanan protegi cu tin den e area aki no por ser otorga pa motibo di aspectonan di legislacion riba cual mester basa e “ontheffing” aki.

E Minister di Naturalesa nobo a informa DOW pa no cuminsa cu e trabounan di mantencion riba e caminda aki ainda. E portal a indica cu Eman ta mustra riba e hecho con na momento di traha e brug pa Green Corridor a stipula e condicionnan pa replanta e matanan protegi cu tabatin den e area aki, manera e mangelnan, na e mesun cantidad di mata of hasta mas den e mesun vecindario.

Eman a bisa: “nos mester bira hopi mas estricto cu proteccion di nos naturalesa. Si circunstancia no por evita cu mester construi un infrastructura, e ora mester replanta un cantidad of mas di e matanan. Proteccion di nos flora y fauna ta hopi importante y e propio economia ta depende tambe di e bunitesa di nos isla”, e mandatario a enfatisa. E minister nobo cu ta encarga cu DOW ta Arthur Dowers y prome minister Eman ta encarga cu Naturalesa. Hunto nan mester yega na un solucion pa e situacion aki.