Prome Minister Mike Eman a duna su banda di medaya riba e situacion reinante den tereno gubernamental na Aruba durante un conferencia di prensa di gobierno en cuanto retiro di sr. Otmar Oduber. Minister Eman ta admiti cu desde Januari caba e situacion tabata basta turbulente pero cu e no ta e tipo di lider pa termina cos mesora. Minister Eman ta insisti cu el a haci un esfuerso grandi pa purba di remedia e situacion pero nada a yuda.
Candidato pa reemplasa Oduber
Aunke Minister Eman no a divulga ainda ken exactamente ta bay reemplasa sr. Otmar Oduber pa e funcion di minister di Turismo, Transporte & Cultura, el a indica cu ya caba tin candidato pa esaki como tambe pa funcion di minister plenipotenciario. Minister Eman a admiti cu ta trata di dos candidato hoben bao di 40 aña di cual ambos lo bira vakminister. Lo por divulga e nombernan den prensa na momento cu nan pasa e proceso di screening.
Akinan por lesa e comunicado di prensa di gobierno:
”Den forma culto y corecto Prome Minister Mike Eman a duna su banda di medaya riba e situacion reinante riba tereno gubernamental na Aruba durante un conferencia di prensa di gobierno. Esaki despues cu a surgi un crisis na momento cu Minister di Transporte, Turismo y Cultura Otmar Oduber a entrega su retiro na Gobernador Refunjol. E retiro aki no a bin di sorpresa ya cu e situacion entre ex-Minister Oduber y demas colega ta tenso pa basta tempo caba. Shete minister no tin comunicacion cu ne y Prome Minister Eman tabata funciona como ‘referee’ entre nan. A pesar di varios intento pa yega na un bon ambiente di trabou, esaki no a logra. Durante su conferencia di prensa un dia prome, ex-Minister Oduber mes tambe a admiti cu di parti di gobierno a haci hopi empeño pa mehora e situacion.”
”Digno di un Prome Minister, Mike Eman a desea su ex-colega minister y ex-colega di partido tur clase di exito den e rumbo politico nobo cu el a scoge. Eman a splica cu Oduber ta activo riba tereno politico pa 27 aña caba y esey tabata motibo tambe cu e semper a busca pa yega na un solucion pa e e problemanan entre Oduber y su coleganan y pa e situacion fastioso cu tabata reina. Esaki pasobra cu e relacion entre e demas ministernan cu Oduber no tabata facil. Pa nan, punto cero a yega basta tempo caba. Flankea pa ministernan di su Gabinete, Eman a conta con desde cu na januari Oduber a bay Gobernador pa mustra su puntonan di inkietud y e cosnan cu segun e no tabata cana corecto, e situacion nunca mas a mehora. A sigui un situacion tenso y empeñonan grandi a wordo haci pa mehora e relacion entre Oduber y demas coleganan. A sigui un periodo unda hunto cu coleganan a trata na yega na un ambiente trankil pa trabou por a sigui den un esfera di colegialidad, pero no a logra. Oduber a scoge diahuebs ultimo pa bandona gobierno y partido.
Eman: “Bisando esaki nos ta para awe dilanti e decision cu el a tuma y esaki ta habri un posicion di minister den Gabinete y ta trece cu ne e responsabilidad pa e formador di e Gabinete (Eman mes) pa inicia un proceso pa asina gobernacion di Aruba sigui riba e ritmo riba cual nos a bin ta goberna e pais aki desde 2009. Cu dedicacion grandi y compromiso importante pa nos comunidad. Comunidad ta satisfecho cu e trabounan haci y ta consciente tambe cu semper ora tin reto esaki ta crea oportunidadnan. E oportunidadnan aki ta crea impulso pa e bon trabounan continua cu un dinamica y forsa positivo.”
Eman a bisa cu e mainta ey a discuti cu Conseho di Minister riba e dos posicionnan habri, cu ta di Minister Plenipotenciario na Hulanda y di e cartera cu Oduber a laga vacante. “Como formador mi a pidi apoderacion di Conseho di Minister y di fraccion di AVP cu ta esun cu tin cu duna aprobacion pa e proceso di nominacion di ministernan nobo.” Eman a conta cu el a haya aprobacion pa dos candidato y cu actualmente ta haciendo screening riba nan y otro siman e nombernan ta keda divulga. “No necesariamente e cartera di Turismo ta wordo yena pa un persona nobo. Por bien ta cu ta bin un reparticion di cartera. Esey a keda habri, pero ami como formador a haya e apoderacion pa dos nomber pa cuminsa cana e proceso di screening y tur loke un formador tin cu haci ora e ta apunta un minister y un GevMin..”
Eman no a divulga e nombernan ainda, pasobra cu e kier pa e proceso cana su rumbo prome. “Nos ta contento di por a yega asina lihe na un aprobacion pa e formador pa dos persona.”
Puntonan di conflicto
Sr. Eman ta comenta cu: ”Cada bes tog tabata resulta cu cosnan entre ministernan no tabata cana manera cu bo ta spera y esey a haci tog cu e meta cu mi tabata tin pa mira si por a trece colega Otmar Oduber bek den e team, finalmente a resulta di no ta factibel.” Segun Prome Minister, retiro di sr. Oduber a bini na via di acumulacion di varios cos. E retiro aki no a bini di sorpresa ya cu e situacion entre ex Minister Oduber y demas colega ta tenso pa basta tempo caba. Segun presidente di parlamento sra. Mervin Wyatt Ras, di tur fraccion por a tuma nota cu no tabata tin ningun contra e decision di e retiro aki di cual a wordo conclui den e reunion pidi pa su excelencia gobernador Fredis Refunjol. E meta tras di e reunion aki tabata pa parlamento comparti su pensamento riba e retiro di sr. Otmar Oduber pa asina e proceso cana su caminda debidamente. Sin embargo, fraccion di MEP a pidi pa un reunion publico pa debati en todo caso riba e motibonan y puntonan di conflicto di e retiro aki cual mester wordo yama dentro di 30 dia. ”Mi ta haya tiki straño cu fraccion MEP a pidi e debati akinan pasobra cu e proceso ta dicta cu naturalmente mester bin un reunion di un comision central. Esaki eigenlijk tambe ta un reunion publico, e no ta wordo transmiti pero e ta un reunion cu bo mag drenta den sala y wak e. Esey ta e procedura cu ta wordo hiba,” sra. Wyatt Ras ta bisa Bon Dia Aruba. Sra. Evelyn Wever Croes, lider di fraccion MEP ta comenta cu: ”Ora ami como parlamentario, pidi un reunion publico firma hunto cu dos colega dimi, mi no ta kere cu tin un hende akinan cu por nenga esaki pasobra reglamento di ordo ta bisa cla y raspa cu den 30 dia bo tin cu yam’e. Cu bo ta di acuerdo cune of no, esey ta bo asunto. Pero bo no por bin bisami cu e no ta usual!”
