(NLTimes)—Prome Minister saliente, Mark Rutte, no ta bay ta e lider di partido VVD den e eleccion binidero, segun el a bisa prome cu e comienso di e debate parlamentario riba e caida di su Gabinete. “Ora e gabinete nobo drenta mi ta bay bandona politica.”
Rutte a bisa cu el a tuma su decision diadomingo. “Tabatin speculacion den e ultimo par dia tocante kico lo por motiva mi. E unico contesta pa esaki ta Hulanda. Mi posicion mester ser mira di e perspectiva aki.” P’esey el a dicidi pa no haci su mes disponibel pa lidera VVD den e proximo eleccion.
Rutte a subraya cu su decision pa bandona politica tabata un di su mes y tabata completamente personal. El a basa esaki riba e desaroyonan den e ultimo par siman. El a notifica e lider di VVD den Tweede Kamer y e presidente di su partido, segun el a conta.
Gabinete Rutte IV a cay diabierna pa via di e crisis di recepcion di asilo na Hulanda. Rutte a bisa cu e diferencianan di e partidonan di coalicion riba e asunto di migracion a prueba di ta ireconciabel, particularmente riba e punto di reunificacion di famia pa refugiadonan—buscadonan di asilo di ken nan aplicacion a ser aproba y a ricibi residencia na Hulanda. Gobierno a plania pa implementa restriccionnan extra riba e reunificacion di famia pa asina baha e velocidad di entrada di buscadonan di asilo. E medida aki, cual a ricibi critica pisa, a ser rechasa pa e Conseho di Estado, cual a yama esaki ilegal.
Durante e conferencia di prensa diabierna, Rutte a bisa cu e tabatin e intencion di keda como Prome Minister saliente riba e Gabinete vigilante te ora cu e Gabinete nobo ser instala. Varios partido di oposicion, incluyendo GroenLinks, PvdA y PVV, a anuncia nan intencion pa entrega of apoya un mocion di cero confiansa contra Rutte durante e debate parlamentario, cual a tuma luga ayera. Si e mocion aki pasa, Rutte lo mester renuncia inmediatamente.
Gabinete Rutte IV a cay 543 dia despues di e drenta gobierno. Prome cu esaki, Gabinete Rutte III tambe a experencia un caida pa via di e scandal di e prestacion di cuido pa mucha den cual e Autoridad di Impuesto inhustamente a acusa miles di mayor di fraude y a laga hopi den dificultad financiero pa medio di kita tur nan beneficio.
Oposicion kier saca Rutte for di gobierno inmediatamente
Partidonan den oposicion den Tweede Kamer ta satisfecho cu e anuncio di Rutte cu e no ta bay regresa como lider di VVD den e proximo eleccion y ta bay bandona politica despues cu e Gabinete nobo drenta.
PvdA y Groenlink a conta Nieuwsuur cu nan lo entrega of apoya un mocion di cero confiansa contra Rutte. Lider di oposicion, Geert Wilder, tambe kier pa Rutte renuncia como Prome Minister: “E mester baha inmediatamente,” e lider di PVV a tweet.
Pa lider di PvdA, Attje Kuiken, y lider di Groenlinks, Jesse Klaver, un Prome Minister administrativo lo reemplasa Rutte te ora cu tin eleccion y un Gabinete nobo drenta. E Prome Minister interino mester tin distancia for di politica. “Tin varios candidato adecua pa e rol aki,” segun Klaver. Kuiken kier kita e “pica politica” y “e pica politica awo ta yama Mark Rutte.”
Expertonan no ta kere cu un Prome Minister administrativo por ser apunta asina facil. Tweede Kamer lo mester cuminsa un proceso di formacion cu un scout, un informante y negociacionnan di formacion. Segun Wim Voermans, ken ta profesor di Ley Constitucional a bisa cu un Prome Minister interino no por cuminsa sin un Gabinete interino nobo. “Esaki no ta posibel den nos sistema.”
E Prome Minister saliente ta bay laga un buraco atras ora e renuncia for di politica. VVD te ainda no tin un sucesor cla. Y pa casi 13 aña, Rutte tabata e cara di politica nacional na Den Haag.
