Ayera a tuma luga traspaso di poder entre Presidente saliente y Presidente nobo na Panama. Prome Minister Evelyn Wever-Croes a asisti na e cena di despedida di Presidente saliente, Juan Carlos Varela dispidiendo di su periodo como Presidente diadomingo anochi.
Prome Minister Wever-Croes a ser invita pa señor Juan Carlos Varela. E traspaso di poder a tuma luga ayera caminda cu Laurentino Cortizo ta tuma e mando di Panama over for di e Presidente saliente. Prome Minister Wever-Croes a presencia e traspaso aki den nomber di Reino y di Aruba.
E Prome Minister Arubiano y su casa a wordo ricibi pa Vice-presidente di Panama alabes Minister di Relacionnan Exterior di Panama, Isabel de Saint Malo de Alvarado hunto cu su casa, diadomingo na Cancilleria, pa un recepcion di gradicimento pa e cooperacion. Tabata presente tambe Rey Felipe di Spaña y Presidentenan di Peru, Guatemala, Bolivia, Honduras entre otro mandatarionan.
Manera custumber, probechando tambe di su biahe na Panama, Prome Minister Wever-Croes a reuni cu varios otro hefe di estado kendenan tambe lo ta presente na Panama pa e traspaso presidencial. Esaki ta un oportunidad pa estrecha relacionnan cu diferente pais, y specialmente Panama.
Entre Panama y Aruba tin lasonan cu ta uni nos. Un desaroyo cu Aruba ta trahando riba dje ta pa haci nos Free Zone mas exitoso. Panama den esaki ta un bon ehempel. Otro desaroyo cu Gobierno kier bin cune pronto, ta pa haci Aruba un Hub logistico tanto pa transporte maritimo, como transporte aereo caminda cu nos wafnan ta hunga un rol importante. Den combinacion cu Panama, segun Prome Minister, Aruba por tin hopi mas beneficio cu esaki.
“Tin hopi tema di negoshi, comercio cu lo haya atencion na Panama pa desaroyo di nos pais. Ta un orguyo pa mi pa representa Aruba y Reino na Panama pa traspaso presidencial”, asina Prome Minister Evelyn Wever-Croes a duna di conoce.
