“Ohala cu Parlamento sostene e presupuesto pa e aña aki pa nos sigui traha duro riba e metanan”

Dialuna siman pasa, Parlamento a cuminsa trata presupuesto pa aña 2022 na unda cu durante e siman, Ministernan di Gabinete Wever-Croes a defende e presupuesto di nan ministerionan. Awe dialuna 4 di april, ta toca turno di Prome Minister Evelyn Wever-Croes pa defende e presupuesto pa 2022 di su ministerio di Asuntonan General y tambe di Infrastructura.

Aña di Inversion y Oportunidad

Prome Minister a remarca cu e presupuesto aki ta sumamente crucial pasobra e aña aki Gobierno di Aruba a decreta como Aña di Inversion y Oportunidad y Gobierno di Aruba tin un rol pa hunga den e oportunidadnan di inversion.

“Nos ta pensando aki den inversion di bo mes y den e ser humano en general pero tambe inversionnan economico cu ta crea mas cupo di empleo. Akinan ta hustmante caminda cu e departamentonan cu ta resorta bao mi ministerio, tin un papel hopi importante pa hunga pa sostene”, Prome Minister a expresa.

Den e presupuesto, apesar di limitacionnan financiero di Gobierno, a purba pa presupuesta e fondonan cu tin mester pa haci e trabao. Sinembargo, atrobe door di e limitacionnan financiero, esaki ta limita na loke ta realmente necesario so. “Tin varios soño y idea cu nos tin cu pospone pa e añanan cu ta bin nos dilanti”.

Inversionnan:

RWZI y otro inversionnan

Den e presupuseto aki, ta enfoca hopi riba algun proyecto cu lo haya prioridad, entre nan e inversion den e RWZI cu ta e plasnan cu tin na Bubali y Zeewijk y na Parkietenbos. Mehora e calidad di e awa y asina haci cu e holor no ta bira un molester pa esnan cu ta biba of cu ta eybanda. Lo renoba y expande e plantanan aki den capacidad cu Aruba tin mester den e temponan aki. Pa esaki, tin Awg 16 miyon florin presupuesta y ta spera di haya aprobacion pa por haci e inversion aki. “Tur hende a papia di dje y expresa nan preocupacionnan pa cu e problema aki y mi ta spera pa tur hende aproba e presupuesto tambe”, Prome Minister a enfatisa.

Un otro aspecto ta pa sanea e situacion di riool cu tin banda di Royal Plaza y e edificio caminda DOW tabata cu ta un problema serio. Pa esaki tambe ta spera di haya e sosten pasobra sin placa no lo por soluciona e problema aki. Tambe pa sanea e problemanan ora cu awa yobe y ta keda para na Plam Beach, Tanki Leendert y Pos Chikito. Den e presupuesto aki tin e fondonan necesario aloca pa soluciona e problemanan aki.

e-Government

Un otro proyecto importante pa sostene tur e desaroyonan den Gobierno, ta e-Government cu ta e parti di digitalisacion. Lo digitalisa e edificionan di gobierno mas tanto posibel pa asina mehora e calidad di bida di cada ciudadano. Aworakinan e ciudadanonan tin cu pasa di un departamento pa otro, di un loket pa otro y tin biaha bay bin bek un par di biaha. Cu e-Government e ciudadano for di su cas of trabao por haci tur e tramitenan aki y haya e servicio cu e por haya sin cu e tin cu bay di un banda pa otro y asina ta scapa hopi tempo cu por dedica na cosnan mas agradabel den bida. Tin inversionnan den e-Government pe banda aki pa adapta y mehora e situacion di digitalisacion na Kadaster, BID, DTI y tambe na Departamento di Asuntonan Huridico. “Nos ta spera di haya aprobacion p’e presupuesto y e bon noticia ta cu pa otro aña nos ta haya fondonan di Union Europeo pa yuda nos cu e proyecto aki pa asina e bay mas lihe”, Prome Minister a duna di conoce.

Departamento di Recurso Humano

Pa loke ta trata e Departamento di Recurso Humano, hopi atencion ta wordo poni den presupuesto pa e Landspakket cu ta e palabracionnan cu Gobierno a haci cu Hulanda na unda tin un cantidad di tareanan cu ta trata recurso humano y inversionnan cu mester wordo haci y kico ta e meta cu nos tin pa yega. “Nos tin cu baha nos gastonan berdad pero mas importante ta pa nos tin un aparato gubernamental cu ta traha eficiente y eyden tambe e inversionnan ta poni den e presupuesto”.

Infrastructura

Importante tambe ta e retrasonan cu tin na departamento di infrastructura na DIP pa loke ta trata perticionnan pa casnan, tereno comercial, cambio di destinacion y huurgrond. E aña aki tin e fondonan presupuesta pa atende cu e atrasonan aki.

Conclusion

“Nos a haya un total di 180-190 pregunta di Parlamento di cual tur nos a contesta. Tambe mi lo hiba ter inzage algun documento cu miembronan di Parlamento a pidi pa nan studie. Ya dos siman pasa mi a entrega e Relato Anual 2021 di mi minsiterio y eyden bo ta mira varios di e metanan y deseonan cu nos tin pa cumpli den aña 2022 cu ta hopi importante.

Parlamento tin tur informacion cu nan tin mester pa trata e presupuesto. Ohala cu dialuna awor Parlamento sostene e presupuesto pa e aña aki pa nos sigui traha duro riba e metanan. Con cu bay bin, nos ta saliendo di e pandemia, pa trata presupuesto den e temporada dificil aki ta un reto pero ta hunto so nos por haci’e. Ohala hunto nos por para pa saca nos pais padilanti”, Prome Minister Evelyn Wever-Croes a termina bisando.