(AP) — Prome minister demisionario na Libanon ayera a pidi Iran yuda sigura un acuerdo di alto al fuego den e guera entre Israel y Hezbollah, y a parce di urgie pa convence e grupo militante pa acepta un acuerdo cu lo rekeri pa retira di e frontera entre Israel y Libanon.
E prome minister a haci e comentarionan den negociacionnan cu Ali Larijani, un consehero top di e lider supremo Irani, Ali Khamenei. E bishita di Larijani na Libanon ta yega mientras Merca ta continua pusha ambos banda pa acepta un acuerdo pa caba 13 luna di intercambio di tiramento entre Israel y Hezbollah.
Iran ta e sostenedor principal di Hezbollah, y pa decadas ta bin financiando y armando e grupo militante Libanes pa decadas. Hezbollah a cuminsa tira raket den nort di Israel e dia despues di e atake sorpresa di Hamas contra Israel dia 7 di october 2023, iniciando e guera na Gaza – impulsando intercambio entre e dos banda desde esey.
Desde fin di september, Israel a escala dramaticamente su bombardeo di Libanon, primintiendo pa manca Hezbollah y caba cu su atakenan na Israel. Mas di 3,300 persona a muri na Libanon pa tiramento Israeli – 80 porciento di nan den ultimo luna – ministerio di Salud di Libanon a bisa.
Segun medionan Libanes, embahador Mericano, Lisa Johnson a entrega un propuesta di un acuerdo pa alto al fuego na presidente di parlamento Libanes, Nabih Berri, kende ta liderando e negociacionnan representando Hezbollah.
Un oficial Libanes a confirma cu Beirut a ricibi un copia di un propuesta basa riba resolucion 1701 di Conseho di Seguridad di ONU, cu a pone fin na ultimo guera entre Israel y Hezbollah den berano di 2006.
E resolucion ey, entre otro, ta bisa cu solamente ehercito Libanes y mision di paz di ONU mester opera den sur di Libanon, loke ta nifica cu Hezbollah lo mester elimina su presencia eynan. E provision aki nunca a ser implementa. Libanon ta acusa Israel di tambe viola e resolucion door di mantene control di un area chikito den disputa na e frontera y ehecutando vuelonan militar frecuentemente riba Libanon.
E oficial Libanes no a duna detaye apart di bisa cu Israel ta insistiendo pa inclui algun garantia.
Embahada Mericano a nenga di confirma of rechasa e reportahenan.
Den combersacion cu Larijani, prome minister demisionario Najib Mikati a urgi Iran pa yuda implementa resolucion 1701. El a bisa cu gobierno Libanes kier pa e guera stop y implementa e resolucion “den tur su detaye”, segun un declaracion emiti pa su oficina.
Mikati, kende den simannan recien a bira mas critico di e rol di Iran na Libanon, tambe a bisa cu gobierno kier Iran yuda unidad nacional Libanes y no tuma un posicion sosteniendo un banda contra otro.
E sosten di Iran pa Hezbollah a yuda e grupo, cu ta e fraccion mas poderoso entre musulman Shiita na Libanon, pa domina politica di e pais den ultimo decada.
E guera entre Israel y Hamas a cuminsa despues cu militantenan Palestino a invadi Israel dia 7 di october 2023, matando alrededor di 1,200 persona – mayoria civil – y secuestrando otro 250, incluyendo baby.
Bombardeo di Israel y ofensivanan terestre desde esey a mata mas di 43mil persona na Gaza, oficialnan di salud Palestino ta bisa. E oficialnan no ta distingui entre civil y combatiente.
