Prome Minister Evelyn Wever-Croes, a invita tur lider politico di partidonan politico cu a participa den eleccion 2017 pa asisti diaranson atardi na un reunion importante tocante e condicionnan di Hulanda pa cu ayudo financiero pa e derde tranche y e manera cu Hulanda a trata cu esaki.
E encuentro aki por a wordo sigui via medionan social. Di e manera aki, Gobierno di Aruba, na un manera transparente a haci posibel pa tur hende por sigui e encuentro aki tambe pa asina e informacion a yega tur caminda.
Esaki ta e prome biaha cu e lidernan di cada Partido y of un representante tawata hunto na mesa. Presente tawata Lider di Partido RED, sr. Ricardo Croes, Lider di Partido Raiz, sr. Ursell Arends, Lider di Partido POR, sr.Andin Bikker, Lider di Partido UPP/PPA, sr. Booshi Wever, Represante pa Partido AVP, sr. Robert Candelaria y Presidente di Partido MEP, sr. Hendrik Tevreden.
Durante e reunion, sr. Derrick Werleman, Director di Departamento di Finanzas y sr. George Croes director di Departamento di Legislacion y Asunto Huridico, DWJZ, a duna presentacion detaya riba e situacion financiero di pais Aruba cu Covid-19 a ocasiona y e condicionnan pa e tercer likides pa cu ayudo financiero pa e siguiente lunanan.
E lidernan politico a declara nan desacuerdo cu e manera di procede di Hulanda y a urgi Gobierno di Aruba pa crea espacio pa negociacion riba e condicionnan.
E lidernan politico a expresa tambe cu nan ta contento di a participa den e proceso na un momento asina crucial pa nos pais. Esaki ta e prome biaha cu lidernan politico a sinta na mesa hunto y Wever-Croes a duna di conoce, cu si ta p’e, esaki lo no ta e ultimo biaha.
Comments are closed.