Tocante e deseo di Hulanda pa Aruba cumpli den ley di Aruba cu loke a acorda den protocol di november 2018 cu no a ser inclui den LAft, na su lugar a bin cu cambio riba iniciativa di fraccion di partido MEP, pa elimina supervision di gobierno di Reino mediante un cambio di e ley di Aruba, unda a pone den e ley unda ta aparece “Rijksministerraad” na su lugar “Staten di Aruba”.

E cambio di ley aki a keda aproba pero nunca a bin na vigor, Bon Dia Aruba a puntra prome minister Evelyn Wever-Croes si gobierno ta bay traha riba e cambio di ley ey pa e keda cla prome cu 1 januari 2024.

Pa esaki, prome minister a sigura: “Si. Esey ta referi na e cambio di LAft. Nos a traha riba dje caba y nos a mand’e Hulanda pa nan aprobacion. Pasobra desde 2015 tin un protocol cu gobierno (anterior) di Aruba a cera cu gobierno di Hulanda, cu ta stipula cu Aruba no por cambia e ley su so sin aprobacion previo di gobierno di Hulanda. E ta na Hulanda un luna caba. Den preparacion pa bay riba agenda di Rijks Ministerraad. Tur esfuerso ta dirigi pa keda cla prome cu 1 di januari 2024 pero nos ta pendiente awor di Hulanda.”

Den Bon Dia Aruba su edicion di ayera, a publica un articulo cu ta señala cu ministro Hugo de Jonge (CDA), desde 5 di september 2023, banda di su cartera di Vivienda Popular y Ordenamento Teritorial (Volkshuisvesting & Ruimtelijke Ordening), ta encarga tambe cu entre otro Asunto di Reino, a duna recientemente contesta na varios pregunta di parlamento Hulandes, Tweede Kamer den e caso aki, unda el a referi entre otro na e estado di asunto encuanto e negociacion cu gobierno di Aruba, pa loke ta e temanan supervision financiero y e condicionnan pa e repago di e prestamo cu Aruba tin pendiente.

De Jonge a informa cu en principio e ta habri pa acepta loke a bin ta yama e ‘solucion hibrido’ unda parti di e acuerdo por bay den un ley di Reino y parti por regla den e ley di Aruba (LAft).

Sin embargo, e ta bisa cu en todo caso e normanan di presupuesto y e papel di CAft mester ta regla den e ley di Reino: “Pa por yega na un refinanciamento cu un porcentahe di interes faborabel temporal, mi a anuncia na Aruba cu mester tin un compromiso administrativo prome cu 1 di december riba e inclusion aki (den LAft; red.) y pa 1 di januari mester tin na vigor un cambio di LAft (e ley di Aruba di supervision financiero di 2015; red.), asina cu e supervision ta garantisa desde 1 di januari 2024.”

Nota di redaccion: Ta di spera cu e biaha aki no ta bay tin e tipo di enmienda den parlamento cu no ta palabra cu Hulanda.