Durante di e Pandemia, mescos cu tur pais na mundo, Aruba su economia tambe a sufri. Nos economia a sufri mas debi cu Aruba tin solamente un pilar economico, esta Turismo. Durante Conferencia di Prensa di Gobierno di Aruba dialuna mainta, trempan di comienso di aña, Prome Minister Evelyn Wever-Croes a elabora ampliamente riba entre otro e maneho pa recupera nos economia.

 

Despues cu Covid a dal, Gobierno no a perde tempo y a instala diferente grupo di trabao cu a cuminsa traha riba un Master Plan. 250 boluntario a bin hunto y a traha riba e Masterplan “Reposicionando rumbo di nos pais”, p’asina recupera Aruba su economia. Varios proyecto ya ta andando y e comisionnan ta trahando awor riba e implementacion.

 

Un comision mas chikito a haya e encargo pa bin cu ideanan nobo, diferente, “Out of the Box” cu por contribui na innovacion di Aruba su economia. Despues di a haya un presentacion, Gobierno awor por anuncia cu un grupo di trabao lo wordo instala pa traha riba programa di maneho; “Aruba Outdoor Amenity Economy”.

Kico esaki ta encera?

Cu nos ta bay crea un pilar economico di patrimonio natural, cultural y monumental di Aruba. Un pilar economico di nos hendenan pa nos hendenan, Di nos pa nos mes. Durante di e pandemia paisnan rond mundo a realisa cu e actividadnan social, creativo y recreativo pafo di edificionan ta mas sigur y placentero alaves. Aruba tin hopi potencial den e area aki cu ainda nos no ta probecha di e oportunidadnan suficientemente, specialmente pa e aspecto di balor economico agrega.

E comision a sugeri pa crea Programa di Maneho Strategico pa 3 Ministerio, cual lo stimula actividad nan: Creativo, Recreativo, Cultural cu un balor Social, Laboral y Economico.

E Ministerionan di Infrastructura y Medio Ambiente, di Asuntonan Economico y Cultural combina cu Ministerio di Turismo lo ta envolvi den e programa.

E programa di maneho mester conduci na upgrade e Patrimonionan scogi den e prome fase y traha riba un plan pa mehora e calidad di experiencia di e bishitante na cada un di e Patrimonionan, sea ta nos mes hendenan local of turista.

A inventarisa e Patrimonionan y a cualifica nan den diferente categoria; A) Natural, B) Monumental, C) Historico y Cultural. Ta evaluando na e momentonan akinan condicion pa asina bin cu un plan pa upgrade cada un di nan na forma diferente, fase pa fase segun e capacidad di Gobierno. E idea ta cu cada un di e Patrimonionan ora cu nan ta cla, lo por ofrece den un forma nobo y innovativo, oportunidadnan creativo, comercial y recreativo, cu ta genera empleo y entrada nobo pa nos hendenan y nos economia.

Ehempelnan di esaki por ta; Beach Galeria, Galeria di Arte y Souvenier di Aruba, ubica na nos playanan caminda obra y souvenier cu ta refleha e historia y cultura tipico Caribense di Aruba so lo por wordo bendi. Pues nos artesanonan actual y esunnan nobo cu ta sintinan mes inspira lo por participa. Tur esaki lo ser bon coordina pa e comision y e departamento di e Ministerionan concerni.

Prome Minister a menciona ehempelnan di e proyecto aki, entre otro;Ayo Rock Formation, patrimonio natural, cu balor historico enorme, cu señanan di indian. Lo upgrade e facilidad, bon parkeo, dun’e un entrada atractivo, borchinan di informacion y indicacion di e ruta pa sigui, y e partinan cu por saca potret, y mas importante, un luga cu ta bende souvernir di e luga exclusivamente. Pues souvenir di Ayo bo por haya eynan so. Faro ta un otro. Souvernir di Faro bo ta haya eynan so y lo tin luga unico pa saca potret ey nan. Eagle beach tambe, un beach cu a gana hopi reconocemento mundial, nos lo upgrade e y haci’e asina atractivo cu cada turista cu bin Aruba mester bishit’e. Baby Beach ta un otro.

E trabounan aki lo cuminsa pronto. Esaki ta crea un oportunidad unico pa nos artesanonan, desaroyo economico na cada un di e luganan aki, empleo pa nos hendenan y ta duna mas real se y contenido na nos producto turistico.

“Pronto e comision lo informa tocante di e proceduranan pa participa na e Workshop nan creativo cu lo bay wordo organisa pa stimula e industria Creativo – Artisanal. Ya ta ora cu nos souveniernan y demas obranan di arte cu nos ta decora na cas por wordo traha na Aruba. Historia di Indigena cu a tuma luga na Aruba, Oro, Aloe, Fosfaat, Industria y Segunda Guera Mundial lo bay bira parti integral di nos producto Aruba pa nos bishitantenan pero tambe pa nos pueblo, nos hobennan y nos muchanan. Asina nan ta cera conoci cu e fundeshi historico y cultural di nos pais. Esaki ta e plan y ideanan pa crea pilar economico y asina desaroya nos economia. Nos ta convenci cu esaki lo trece beneficionan grandi pa nos economia”, Prome Minister Evelyn Wever-Croes a termina bisando.