Durante e prome conferencia di prensa di gobierno di Gabinete Wever-Croes II, prome minister Evelyn Wever-Croes a trece dilanti diferente topico como formacion y comienso di gobernacion, su biahe pa New York siman pasa y sosten di likides pa loke ta resta di aña 2021.

Wever-Croes a cuminsa splica cu den un luna of luna y mey nan lo presenta nan programa di gobernacion na Parlamento di Aruba manera nan a acorda. Nan a palabra cu pa fin di october e gobierno nobo lo ta den parlamento pa asina presenta e acuerdo cu e dos partido cu ta den gobierno awor, cu ta MEP y Raiz, lo splica di manera mas extenso esey.

Di loke ta trata e conmocion cu oposicion a causa tocante formacion di gobierno, Wever-Croes a conta cu el a wordo acerca door di e parlamentario Hendrik Tevreden (MEP), cu a pidi pa nan bay parlamento pa asina duna mas informacion di e manera con e formacion a tuma luga, con e nombramento di candidato a tuma luga, locual Wever-Croes a acepta.

“Mi ta espera cu dentro di poco e reunion aki lo wordo yama y mi ta espera cu lo ta un reunion publico pa tur hende sigui. Y tambe mi ta espera cu tur parlamentario lo t’ey pa haci nan preguntanan, pasobra esey ta e momento y e luga pa haci’e”, el a sigura.

Tambe a trece dilanti cu tabatin confusion den e parti si ministernan a presenta nan curriculum vitae, pa lo cual Wever-Croes a indica cu esaki ta algo cu nunca antes a wordo haci tampoco. Pero cu awor e ta publico, di e ley cu nan ta basa riba dje, e landsbesluit cu nan ta haci e parti di screening ta impedi pa e como formador por comparti informacion cu ta yega na dje durante e screening. “Y asina akinan mi ta spera nos por trece cu e intrankilidad cu a wordo causa bay back na trankilidad y comunidad ta ser conoci un poco mas di cerca cu cada candidato cu a bira minister y kico ta nan cualidadnan cu nan ta trece”, el a bisa.

Biahe pa New York

Wever-Croes a comenta cu siman pasa tabata e siman cu Asamblea General di Nacionnan Uni 2021 a cuminsa. Cada aña Nacionnan Uni ta organisa un Asamblea General, cu aña pasa a tuma luga di forma online pa via di pandemia di Covid-19, y e aña aki tabata di manera presencial y tambe online.

“Nacionnan Uni ta un partner importante di Aruba, specialmente pa nos cu nos ta un pais chikito, pa nos por logra desaroyonan positivo, desaroyonan sostenibel cu nos ta busca pa nos pais, specialmente aworaki saliendo di pandemia”, el a indica.

Diabierna ultimo e tabata presente den reunionnan na New York na unda el a reuni cu diferente persona, como secretario general di Nacionnan Uni Antonio Guterres. Hunto cu prome minister di Hulanda Mark Rutte y representantenan di diferente organisacionnan, como parti di delegacion di Reino, el a logra pone Aruba riba mapa internacional locual ta hopi importante pa e parti di recuperacion.

“Den esaki nos a enfoca mas pa nos por atrae mas inversion cu ta crea cupo di empleo, cu ta locual nos tin mester pa nos por sali di e pandemia aki y su efectonan. Pero tambe pa nos haya mas sosten pa proteccion di nos medio ambiente, nos naturalesa y den e maneho cu nan tin den transicion di energia”, Wever-Croes a bisa.

Biahe di ministernan

Comentando riba e controversia causa pa biahe di ministernan di e gabinete nobo, Wever-Croes a enfatisa tambe cu esey a causa conmocion den comunidad caminda cu dos minister nobo, Ursell Arends y Geoffrey Wever a biaha pa motibonan priva. Pero “ta cosnan cu nan tin derecho riba dje, nan ta hende, nos tur ta hende y ta yega un momento cu mester di un break pa por recarga”, el a menciona.

Articulo 8 di reglamento di orden di conseho di ministernan ta stipula cu ora un minister ta biaha pafo di Aruba, e ta notifica Gobernador, pa cuanto dia y unda e ta bay, den caso si e biahe ta priva of di trabao. Y aparte di esey nan a dicidi cu nan ta informa Parlamento ora cu nan ta biaha pa trabao. Algun tempo pasa mester a informa parlamento si tabata biaha pa motibonan priva, pero segun el a sigura, “cierto parlamentarionan e tempo ey di fraccion di AVP no tabatin e madurez suficiente pa por procesa informacion y tabata haci wega hopi infantil cu esey”, Wever-Croes a expresa.

Sosten di likides pa october, november y december 2021

E proceso di esaki, segun Wever-Croes a indica, ta cu Aruba ta entrega na Hulanda cuanto tin mester pa sosten di likides. Y CAft ta revisa e peticion aki, duna un conseho na Gobierno Hulandes y despues Gobierno Hulandes ta aproba of no na base di e conseho ey.

Desde cu Aruba a cuminsa haya sosten di likides, cada biaha tabata topa cu diferente situacionnan na unda cu mester dialoga mas riba dje, pero nunca Aruba a haya den un situacion caminda cu CAft a duna un conseho negativo, pa diferente motibo, cu segun el a comenta nan no ta di acuerdo cune y cu nan ta dialogando na e momentonan aki.

Riba esaki, el a declara cu Gobierno Hulandes kier a tuma e decision pa nenga Aruba e sosten di likides, na unda cu tambe tabatin cierto argumentonan cu cual Wever-Croes a bisa u nan no ta di acuerdo. Diabierna ultimo e tambe a reuni cu secretario di Estado, Raymond Knops.

El a splica cu gobierno nobo a huramenta un siman pasa y cu prome cu esey, desde 30 di maart cu gobierno a cay te cu siman pasa, nan tabatin un gobierno demisionario na unda cu nan no por tuma tur decision manera un gobierno legitimo por haci.

“Mi a pidi nan duna mi espacio pa nos presenta e solucionnan cu nos tin mester pa por bin na remarca pa sosten di likides”, Wever-Croes a bisa.

Dos di e temanan riba cual nan tin opinion dividi ta bay riba Wever-Croes Norm, na unda cu cierto directornan di companianan estatal no por gana hopi mas cu minister presidente. E ley aki ta pone un salario maximo pa nan gana 130% di e salario di un minister presidente. Di esaki, Hulanda a trece dilanti cu mester haci mas ahustacion den ley aki.

Otro punto cu tin mas discusion cu e anterior tin di haci cu cortamento den gastonan di salud, na unda cu a logra corta 40 miyon di florin den cuido medico, pero Hulanda tabata kier 60 miyon y nan a considera cu esey no ta suficiente.

Aworaki nan ta papiando riba diferente opcion y diferente alternativa.

Pa finalisa, Wever-Croes a señala: “Sosten di likides ta importante. Si nos no ta haya sosten di likides, nos tin cierto retonan cu nos tin cu atende cune manera e subsidio di salario, paketenan di cuminda, y pa por logra esey nos tin cu mira kico si y kico no nos por paga. Nos tin un luna pa sigui negocia y si nos no logra sali afo, minister Xiomara lo duna kico ta e plan B.”