Ayera mainta, prome minister di Aruba, Evelyn Wever-Croes a ofrece un conferencia di prensa den cual el a trece dilanti un actualisacion di e buskeda di e desaroyadornan pa Refineria di Aruba.

Pa loke ta trata e area aki di San Nicolas, manera ta conoci nan a cuminsa cu un Request Expresion of Interes (REOI) pa fase 1 y fase 2. Den e prome fase tabatin dos opcion, cual tabata trata di reapertura di refineria of modernisacion di instalacionnan; y di otro opcion tabatin e desaroyo industrial adicional nobo dentro di area di refineria.

Banda di esey, el a anuncia cu nan tambe a habri e REOI 2 na unda a duna un opcion C, cu ta papia di desaroyo industrial nobo reemplasante, na unda lo no usa e instalacionnan existente mas y lo usa espacio aki na un manera diferente.

Esaki a sucede na luna di juni ultimo, pero te cu 31 di juli a habri e filenan electronico manera a keda e-mail na Notario y un siman despues el a manda tur data pa RdA pa su evaluacion respectivo. Esaki tabata bao un Advisory Branch cu Wever-Croes a institui den un decreto ministerial dia 30 di juni, pa 10 di september nan a duna un rapport di evaluacion cu recomendacionnan pa fase 1 cu REOI 1 y 2.

Asina mes, el a señala cu tabatin 48 interesado cu a cumpli cu tur e rekisito manera tabata prescribi. E ora ey a conclui e fase 1 y a involucra departamento di Asuntonan Economico (DEZHI) pa asina por haci e calculacionnan macro-economico riba e impacto cu REOI 1 lo por tin riba Aruba.

Aworaki ta den fase 2 y esunnan cu no a pasa di fase 1 pa fase 2 ta keda pendiente, segun Wever-Croes, pa motibo cu nan no sa si por ta cla cu un di nan. RDA a establece un Data Room na unda nan tin tur e informacion disponibel pa tur interesado por a haya e informacion aki. Esunnan cu a pasa pa fase 2 a haya un invitacion pa haci un binding offer y tambe a wordo firma un Non-Disclosure Agreement pa garantisa cu nan ta keda cu e informacion y no lo leak esaki.

Interesadonan cu a pasa pa fase 2 tambe a haya oportunidad pa bishita Aruba pa mira y haci evaluacion propio di instalacionnan y pa haya un walk through, pa asina nan por haci un binding offer realistico. E advisory branch ta finalisando e fase 2 na e momentonan aki, segun Wever-Croes a manifesta, y pa fin di november nan lo informa Gobierno di e resultadonan di fase 2.

Den e REOI 2 ta existi algun alternativa cu a wordo poni. Wever- Croes a trece dilanti cu ta papia di desmantela e area, desaroya un tipo di industria sostenibel, haci di Aruba un isla circular sostenibel, desaroya un jachthaven, desaroya un zona residencial of condominio, shipyard, hotel, warehouse grandi of un universidad. Di esaki el a bisa cu e mester di un proceso grandi, pero cu un cantidad di aña limita.

Tambe a duna di conoce personanan cu ta den advisory committee den e cual Reynold Arends ta presidente c.q. Lead negociator; hunto cune Edward Oduber cu ta miembro cu experticio riba Refineria di Aruba; Dr. Kim Gobert miembro cu experticio riba nivel internacional cu industria petrolero; Judesca Briceño cu tin experticio financiero; Rene Leonora cu experticio riba tereno ambiental y Maura Brown consehero legal.

Tin un interesado cu ya caba a bin Aruba cu su ekipo, na unda a papia cu gerencia riba diferente aspecto logistico y tecnico. Un otro ekipo lo yega na Aruba dentro di poco pa haci un estudio mas profundo, despues ora bay bek na Merca nan lo pone nan experiencia riba papel pa asina haci un binding offer.

Wever-Croes a informa cu e conclusion di DEZHI ta bisa cu e impacto directo di inversion inicial di renobacion y upgrading cu lo ta rekeri di un inversion di USD 2.283 miyon lo duna como resultado un adicion inmediato di USD 1.247 miyon na GDP, di e cual USD 1.163 miyon lo ta di ingreso laboral y USD 85 miyon como contribucion local relaciona cu compra di material.

Consecuentemente esaki lo induci un impulso di 16.1% di GDP na 2021, 19.8% na aña 2022 y 5.2% na aña 2023 cu e contribucion mas grandi den 2022.

Igualmente el a comenta cu siman pasa Aruba a haya bishita di Consul di Merca, Sr Greenberg na unda el a reitera e sosten di Gobierno Mericano pa Gobierno di Aruba y asina por yega na un bon desaroyador y inversionista pa cu inversionnan.